Агресивното однесување кај децата може да се намали со еден додаток

Омега-3 масните киселини, достапни како додатоци во исхраната во форма на капсули со рибино масло, се познати по нивните корисни ефекти врз менталното и физичкото здравје. А новото истражување открива дека омега-3 масните киселини можат да ја намалат агресијата за 28 проценти.

Овие податоци не се изненадувачки, бидејќи претходните истражувања покажаа дека омега-3 масните киселини играат улога во спречувањето на ментални нарушувања, како што е шизофренијата. Покрај тоа, постојат индикации дека недостатокот на омега-3 може да придонесе за развој на агресивно и асоцијално однесување.

Истражувачите од Универзитетот во Пенсилванија се надоврзаа на претходните истражувања испитувајќи како омега-3 масните киселини влијаат на агресијата. Нивната мета-анализа опфати речиси 4.000 субјекти. Студиите траеле во просек 16 недели и опфаќале различни демографски групи, од деца до постари лица.

Низ сите испитувања, беше откриено скромно, но забележливо намалување на агресијата до 28 проценти кај испитаниците кои користеле додатоци на омега-3 масни киселини.

Ефект врз мозокот

Истражувањата покажаа дека дополнувањето со омега-3 масни киселини може да доведе до намалување на агресивното однесување, вклучувајќи и реактивна (како одговор на провокација) и проактивна агресија (предумисла однесување).

Сè уште не е целосно јасно како омега-3 масните киселини влијаат на намалувањето на агресијата, но истражувачите веруваат дека омега-3 го намалува воспалението и ги одржува виталните процеси на мозокот, што влијае на регулацијата на агресијата.

Освен што ја намалуваат агресијата, омега-3 масните киселини се поврзани и со намален ризик од срцеви заболувања, вклучувајќи фатални срцеви и мозочни удари. Овие придобивки дополнително ја поддржуваат идејата дека вклучувањето на омега-3 во исхраната е од суштинско значење за целокупното здравје.

Дали може да се примени во пракса?

Експертите велат дека наодите од ова истражување сугерираат дека зголемувањето на внесот на омега-3 може да биде корисно во различни контексти, од заедницата до правосудниот систем. Неврокриминологот Адријан Рејн ја нагласува важноста на суплементацијата на омега-3 како дополнителна опција за намалување на агресијата.

„Родителите кои се занимаваат со агресивно однесување кај своите деца треба да знаат дека дополнувањето со рибино масло може да има позитивен ефект, заедно со другите терапии“, рече Рејн.

Омега-3, сепак, не е магично апче

Иако истражувањето дава ветувачки резултати, потребни се дополнителни студии за подобро да се разбере механизмот со кој омега-3 влијае на агресијата, пишува Science alert.

– Омега-3 не е магично апче за решавање на проблемот со насилството во општеството, но може да игра важна улога – заклучи Рајн.

Истражувањето беше објавено во списанието „Агресија и насилно однесување“, а претходната верзија на статијата беше објавена во јуни 2024 година.