Агелер на средба со Африм Гаши, дали ја заобиколува Сиљановска?

Амбасадорката на САД во земјава, Анџела Агелер денес ќе има средба со новиот спикер на Собранието Африм Гаши. Според најавите Гаши ќе се сретне и со грчката амбасадорка Софија Филипиду, која сѐ уште не била на средба со претседателката Гордана Сиљановска-Давкова од разбирлива причина, откако го напушти инагуративниот говор во Собранието.

И додека за грчката амбасадорка е јасно што се случува, не е јасно зошто меѓу средбите со 11 странски амбасадори во земјава и неколку преставници на меѓународни институции, поглавари на верски заедници, па и преставници на универзитети, таа сѐ уште немаше средба со амбасадорката на САД во Македонија. Испаѓа дека освен што ја налути Филипиду, Сиљановска ја налути и Агелер и веројатно не со ставот кон уставното име и Преспанскиот договор. 

Според она што може да се види од архивите, Агелер ѝ го честиташе меѓу првите изборот на Сиљановска на функцијата  нарекувајќи го „историски“, како прва жена претседател, при што најави дека САД ќе продолжат да ја поддржуваат евроинтеграцијата на земјата. Сиљановска ѝ возврати со пораката дека „со нетрпение очекува  да го обноват духот на македонско-американските односи, проширување на рамката на нашето стратешко партнерство и соработка, како во евроатлантската димензија, така и на билатерален план“.

По инагуративниот говор грчките медиуми пишуваа дека американскиот државен секретар Ентони Блинкен имал веќе напишано писмо со честитка до Сиљановска, но го задржал во фиока и место него официјално дојде честитка од Џејмс О’Брајен, помошник-државен секретар за Европа. Што се случи во меѓувреме? 

Освен поигрувањето со Преспанскиот договор, за кој американскиот претседател Џо Бајден има и извршна наредба дека ќе го штити со санкции од тие што го загрозуваат, Сиљановска имаше и недипломатска порака во инагуративниот говор дека роденденот „нема да верувате, го поминав со амбасадорката на САД, исто така во еден женски разговор“, со која сакаше да прати порака дека ВМРО-ДПМНЕ е посакуван партнер за САД, а не како што очекуваше јавноста.

Секако останува и можноста Сиљановска да не сака да се види со Агелер откако ги виде реакциите за Преспанскиот договор, а нема што поубедливо да каже од тоа дека ќе го почитува но нема да го применува во настапите. Но, тешко дека е така откако заедно славеле роденден и откако му даде приватна нота на тој настан.     

Од кабинетот на Сиљановска порачаа дека „планот за средби на претседателката со преставници на странски земји и дипломати се прави согласно можностите и агендата на претседателката и на амбасадоприте и другите дипломати“. (Н.В.)