Гала

Лејла Сабит

Отварање, премиера, коктел, промоција, вечера или концерт.

Во долга тоалета и смокинг, сите ви се смешкаат, љубезни се, ве поздравуваат, ве канат на кафе и се сликаат со вас селфи.

Убаво ви е во душата, се чувствувате како ВИП личност, газите по црвен килим и седите во прв ред.

Во паузите шетате со скапо вино или виски во рака и муабетите за политика со полна уста.

Парфемите се мешаат со џагор, сурфањето по мобилен со ракоплескање, а тишината со шушкање на кеси.

Некој доаѓа подоцна, некој си оди порано.

Кога ќе се изгаснат рефлекторите…

Во спортска облека, со неиспрана коса и без шминка не ве препознаваат, ве одминуваат, не се сеќаваат на кафето, а селфито е веќе избришано.

Се чувствувате мизерно, во душата се собира гнев, газите по дупки низ улиците и се гушите од пот во автобусите.

Шетате со вода од пластично шише, давате по некој денар на бездомници и муабетите за политика додека џвакате хот-дог со сенф.

Животот е секој ден, а не една вечер.

Тоалетата и смокингот мирисаат на нафталин од неносење.

Секој што е млад, ќе стане стар.

Да си ѕвезда, не значи и среќа.

Успехот не носи секогаш пари.

И Скопје како и  Кан без гала вечери е обичен град.

Со богати и сиромашни граѓани и со љубопитни туристи.

Со бесни коли, скапи јахти, обични и брендирани продавници и џипси свадби.

Со нападна архитектура и старински хотели.

Убави жени шетаат низ Дебар маало како старлетите по Кроазета и плажите на Кан.

Зачестија Поршеата по скопските улици, а јахтите ни се укотвени во соседството.

Уживајте во гламурот на Филмскиот фестивал во Кан и на Мајските оперски вечери во Скопје!