Зеленски: Расте дрскоста на Русите

Украинскиот претседател Володимир Зеленски изјави дека „расте дрскоста на Русите“, коментирајќи ги интензивните напади на руските вооружени сили врз територијата на Украина.

Во порака објавена на социјалните мрежи тој рече дека Киев ќе одговори „асиметрично“.

– Дрскоста на Русите расте – сè почесто ја напаѓаат Украина во текот на денот со десетици јуришни дронови. Синоќа имаше 150 дронови, утрово повеќе од 50, а повеќето од нив беа „Шахеди“, информира Зеленски.

Според него, ваквиот развој на настаните покажува непочитување на мировните напори од страна на Москва. Зеленски додаде и дека руските вооружени сили акумулираат сили на „одредени делови од фронтот“.

– Русија продолжува да напаѓа. Секако, ние ќе одговориме на тоа. Ќе одговориме, вклучително и асиметрично, така што Русија дефинитивно ќе ги почувствува последиците од својата дрскост, напиша украинскиот претседател.