Зеленски остро ја обвини Кина дека испорачува оружје за Русија

 Украинскиот претседател Володимир Зеленски ја обвини Кина дека и доставува оружје на Русија. „Имаме информации од Службата за безбедност на Украина (СБУ)“, нагласи Зеленски, додавајќи дека Кинезите им испраќаат барут и артилериска муниција на Русите.

„Мислам дека следната недела ќе можеме да објавиме детали за кинеските претставници вклучени во производството на оружје на територијата на Русија“, истакна тој. Ова е првпат Зеленски да изјави дека Пекинг ги поддржува воените напори на Русија со испраќање оружје. Киев досега тврдеше дека Иран и Северна Кореја ја снабдуваат Русија со оружје.

Сепак, веќе има извештаи кои сугерираат дека Кина испраќа оружје во Русија. Пекинг отсекогаш го негираше ова. Во летото 2024 година, Зеленски рече дека Кина му потврдила дека нема да испорачува оружје.

Пекинг официјално се позиционираше како неутрален кон војната на Русија против Украина, но во исто време ги продлабочи економските врски со Москва и ја поддржа Русија во лицето на западните санкции.

На почетокот на месецов Украинците објавија дека заробиле двајца кинески државјани кои се бореле на руска страна во областа Доњецк. Подоцна, Зеленски објави дека најмалку „неколку стотици“ кинески граѓани се борат на страната на Русија во Украина.

Еден од заробените војници рече дека платил 300.000 рубли (приближно 3.200 евра) на брокер во Кина за да се приклучи на руската армија во замена за ветувањето за државјанство. Пекинг негираше каква било директна вмешаност во војната, нагласувајќи дека апелирал до своите граѓани да се држат настрана од вооружени конфликти.