Запишувањето во средно почнува на 14 јуни – догодина дигитално

На 14 јуни почнува првото електронско пријавување за упис во средно образование во учебната 2025-2026 година, и ќе трае до 17 јуни, соопшти Министерството за образование и наука МОН. Второто пријавување е закажано на 30 јуни. Конечните ранг листи по двете пријавувања училиштата ќе ги објават на 2 јули.

Како и во изминатите учебни години, учениците ќе треба да достават хартиени документи до училиштата, а според министерката за образование Весна Јаневска, се прават напори од следната учебна година процесот целосно да се дигитализира.

За полагањето на државната матура, министерката вели дека оваа година дел од учениците ќе полагаат во холовите и спортските сали во рамки на училиштата, а дел ќе полагаат во амфитеатрите на најблиските факултети, заради поголема објективност на целиот процес.

„Неопходно е да има растојание од 1,5 метар помеѓу учениците, и апелирам до учениците да не се вознемируваат од просторот каде ќе полагаат и да се фокусираат на подготовките“, вели Јаневска.