Западот ги стопира донациите за агенцијата на ОН, која Израел ја обвини дека е „цивилен огранок на Хамас“

Неколку западни влади одлучија да го прекинат финансирањето на Агенцијата за палестински бегалци на Обединетите нации (UNRWA), поради обвинувањата дека нејзини членови учествувале во нападот врз Израел на 7 октомври. Шефот на агенцијата изјави дека на хуманитарната помош од која зависат два милиони Палестинци може да дојде крајот, пренесува Би-би-си.

УНРВА е основана во 1949 година. Работи во Газа, Западниот Брег, Сирија, Либан и Јордан. Се грижи за 700.000 Палестинци кои ги напуштија своите домови по создавањето на Израел. Агенцијата во моментов управува со засолништа за раселените луѓе и ја дистрибуира единствената хуманитарна помош што Израел ја дозволува. Таа, исто така, ја обезбедува клучната инфраструктура потребна за секојдневниот живот во Газа.

УНРВА раководи со медицински и образовни центри, кои вклучуваат центар за обука на наставници и речиси 300 основни училишта. Тие произведуваат и учебници од кои учат младите Палестинци. Само во Газа вработува околу 13.000 луѓе. Тоа е најголемата агенција на ОН во Газа.

Израел го критикува нејзиното постоење затоа што го потврдува статусот на Палестинците како бегалци и им дава надеж да се вратат во нивната земја од која беа протерани во 1948 година или во некоја од другите војни. Судбината на бегалците е централниот проблем на арапско-израелскиот конфликт. Многу Палестинци веруваат во враќање во историска Палестина, чиј дел сега е Израел. Израел ја отфрла идејата и ја критикува УНРВА дека дозволува наследување на статусот на бегалци.

Постојани обвинувања

Израелската влада го оспорува образованието што го дава агенцијата бидејќи тоа „шири антиизраелски ставови“. Во 2022 година, израелското здружение IMPACT објави дека едукативните материјали произведени од УНРВА учат дека Израел се обидува да „го избрише палестинскиот идентитет, да го украде и фалсификува палестинското наследство и да го избрише културното наследство на Ерусалим“. Тие додадоа дека агенцијата промовира антисемитизам, омраза, нетолеранција и пристрасност.

И Европската комисија препозна „антисемитски материјал“ во учебниците, што вклучува дури и поттикнување насилство. Европскиот парламент побара ЕУ да го условува финансирањето на палестинската управа со бришење на таквата содржина. УНРВА нагласи дека таквите извештаи за нивниот едукативен материјал се неточни и дека многу од предметните книги не се ни користат во училиштата.

Неколку западни влади, вклучувајќи ги Велика Британија, САД и Германија, го суспендираа финансирањето на Агенцијата, која се најде во сериозни проблеми. САД се најголемиот донатор. Во 2022 година донирале 340 милиони долари. Германија е втора. Минатата година донирала 162 милиони долари.

Израел долго време ги обвинува ограноците на ОН за пристрасност и антисемитизам. Владата, која е сè почесто критикувана во Израел и во странство, ја искористи можноста да го зајакне својот случај и да го промени фокусот на јавната дебата.

И покрај замрзнувањето на донациите, советникот за безбедност на Белата куќа Џон Кирби рече дека грешката на неколку вработени „не треба да казни цела агенција која помогнала да се спасат илјадници животи во Газа“.

Министерот за надворешни работи на Израел ја нарече УНРВА „цивилна рака на Хамас“ и истакна дека таа не треба да има никаква улога во Газа откако ќе заврши конфликтот, пренесува Индекс.хр.