За прв пат во историјата, Кина направи повеќе трансакции во јуани отколку во американски долари

Минатиот квартал, Народна Република Кина, за прв пат во својата историја, направи повеќе странски трансакции во сопствената валута, јуанот, отколку во американскиот долар, пишуваат медиумите во источна Азија.

Поточно, според податоците на кинеската државна агенција за девизи, во јули кинеските компании и организации направиле 49 отсто од нивните деловни трансакции со странски земји во јуани. Станува збор за сума од 42 трилиони јуани, што по сегашниот курс е близу 6 милијарди американски долари.

Се верува дека добар дел од трансакциите во јуани отпаѓа на трговијата со Русија.

Растот на уделот на јуанот во кинеската размена со странски земји укажува на забрзување на трендот на одвојување од доларот во меѓународната трговија, на што работи Пекинг поради зголемениот геополитички ризик, односно технолошките и економските санкции кои САД и нивните сојузници го спроведуваат против Кина и фактот дека Западот ги замрзна и има намера да ги конфискува средствата на руската централна банка складирани во Европската унија, пишува РТС.

Кина, освен Русија, има договори за меѓусебна трговија со јуани и партнерска валута, без посредство на доларот, и со Бразил и Пакистан, а делумно и со Саудиска Арабија и другите земји од Персискиот Залив.

Судејќи според учеството во финансиските трансакции извршени преку платниот систем на Друштвото за глобални меѓубанкарски финансиски телекомуникации (Свифт), учеството на јуанот во светската трговија е сè уште мало и изнесува помалку од три проценти (2,77), пренесува „Данас“.

Американскиот долар и натаму е најзастапена валута со околу 42 отсто, а пред јуанот се и еврото, британската фунта и јапонскиот јен.

Сепак, јасно е дека учеството на јуанот во финансиските трансакции во рамките на споменатиот систем расте, бидејќи пред пет години беше 1,8 отсто.