За опозицијата ребалансот на Буџетот е фискално нереален и социјално штетен, за власта ја покажува „зрелоста на економската политика“

Во рамки на денешната 62. пленарна седница пратениците дебатираат за ребалансот на Буџетот за 2025 година. За владејачкото мнозинство Буџетот е флексибилен инструмент и се приспособува на реалните економски движења и на приоритетите, додека за опозицијата тој е нереален и нема да го поддржи. 

Пратеникот на ВМРО-ДПМНЕ Бојан Стојановски истакна дека Буџетот е флексибилен инструмент што се приспособува на реалните економски движења и на приоритетите на нашето општество, а воедно потенцираше дека има зголемување на приходите, стабилен дефицит и стабилна фискална политика.

-Станува збор за една важна политичка порака, а тоа е дека имаме капацитет за одговорно и визионерско управување со јавните финансии, со јасна стратегија и со фокус кон потребите на граѓаните. Овој пат не ребалансираме затоа што сме принудени, туку затоа што имаме услови и простор да ги пренасочиме средствата таму каде што ќе создадат најголема вредност, ова е ребаланс на стабилност, ребаланс кој ја покажува зрелоста на нашата економска политика и јасната определба за долгорочна фискална и финансиска одржливост, рече Стојаноски.

Како што кажа приходите растат, трошењето е насочено кон приоритети, а граѓаните се во центарот на фискалната и финансиската политика.

– Приходите се зголемени за 8,6% споредено со истиот период претходната година, расходите се зголемени за 5,1% а дефицитот станува стабилен и контролиран до 4% од БДП, овие индикатори не се само бројки, тие ја отсликуваат состојбата на економијата и на јавните финансии, тие сведочат на тоа дека остануваме на патот на стабилна фискална политика, рече Стојаноски.

Тој истакна дека со зголемувањето на платите се вложува во човечки капитал, со зголемувањето на  пензиите се вложува во достоинството на постарите генерации, а со капиталните инвестиции се вложува  во темелите на економскиот раст.

-Со овој ребаланс предвидени се 800 милиони денари повеќе за покачување на платите, предвидени се 2,5 милијарди денари повеќе за покачување на пензии, вклучени се нови 300 милиони денари за реализација на капитални проекти, што значи дека инвестициите се зајакнуваат, заклучи Стојаноски.

Пратеничката Сања Лукаревска од СДСМ, за ребалансот на Буџетот за 2025 рече дека е фискално нереален, социјално штетен и без развојна компнента и сите три елементи може да се поткрепат со факти.  

Кога се зборува за ребалансот на Буџетот, рече таа, не може да не се зборува за лошата економска ситуација во земјата. 

– Сведоци сме на галопирање на основните трошоци за живот. Синдикалната кошничка за јули е повисока за 630 денари во споредба со истиот период лани. На едно четворочлено семејство му требаат 65.000 денари да го истурка месецот, а 80.000 за оние што живеат под кирија, рече Лукаревска нагласувајќи дека не може да се занемарат податоците на ДЗС за растот на цените. 

Обвини дека ова се случува поради тоа што нема интервенција првенствено во Министерството за економија и труд иигнорирање на Законот за нефер трговски практики. 

– Ова владеачко мнозинство, замислете и своите мерки предложени од нивната програма, 12 мерки кои што ги преточивме како пратеничка група во закон, ги одби, односно тие ветувања од кампањата не важат, иако, пак ќе кажам, се во пресрет и за сметка на ребаланс на буџетот. Нашите амандмани кои што ги поднесувавме и за буџетот и за ребалансот е добро да потсетам дека се истите оние кои што беа поднесени од страна на ова владеачко мнозинство тогаш на опозиција. Значи, сами на себе си ги одбиваат амандманите кои што тогаш актуелно ги зборувале, рече Лукаревска. 

Амар Мециновиќ од Левица зборуваше за трендот на иселување на младите и потребата овој тренд да се спречи и да се амортизира со мерки и буџет кој ќе одговара на потребите на младите и граѓаните. Мециновиќ рече дека „овие ребаланси се катализатори на иселувањето на нашите и не се разликуваат од претходните буџети“. 

-Овој ребаланс е како и претходните буџети, затоа што одговара на интересите на една тесна клика на економско политичката клика во Република Македонија, рече пратеникот на Левица. 

Меѓу другото, тој кажа дека клучните ресурси и ресори на земјата се во раце на странски капитал.  

Седницата продолжува во 15 часот, по редовната пауза, а останати за збор по оваа точка се уште 15 пратеници.