Врховниот суд на Иран најавува експресни судења за лица кои соработуваат со Израел

Судијата на Врховниот суд на Иран, Голамхосеин Мохсени Еџеи, денес изјави дека лицата уапсени под сомнение за соработка со Израел ќе бидат брзо изведени пред лицето на правдата, објави Ројтерс.

„Доколку некој е уапсен за врски и соработка со ционистичкиот режим, неговото судење и казна треба да се спроведат и објават многу брзо, во согласност со законот и воените услови“, рече Еџеи, според новинската агенција Тасним.

Егзекутиран е човек осуден за шпионажа за Израел
За потсетување, државната новинска агенција Мизан денес објави дека Иран егзекутирал шпион кој наводно му пренесувал информации на Израел.

„Есмаил Фекри, агент на Мосад осуден за сериозни злосторства „корупција на Земјата“ и „мохаребе“ (војна против Бога), беше обесен по судењето“, објави Мизан на својата веб-страница, објави агенцијата Франс Прес.

Уапсен пред две години
Властите во Техеран соопштија дека човекот, уапсен во 2023 година, е осуден според исламскиот закон за „водење војна против Бога“ и „корупција на Земјата“, објави ДПА.

Ова беше третата егзекуција поврзана со обвиненија за шпионажа во последните месеци.

Иран го смета Израел за свој заколнат непријател, а двете земји разменуваат воздушни напади откако Израел започна големи напади врз иранските нуклеарни цели минатиот петок.