„Волстрит журнал“: Европа се лизга во сиромаштија

За прв пат во модерната европска историја, генерациите што доаѓаат ќе бидат посиромашни од нивните родители. Со децении, од генерација на генерација, Европејците економски беа сѐ побогати.

Нашите дедовци имаа повеќе од нашите прадедовци, а нашите родители повеќе од нивните родители. Жителите на стариот континент од година во година стануваа побогати, но се чини дека на оваа среќна приказна и дојде крајот. Европејците се посиромашни во последните години.

Куповната моќ во речиси сите европски земји се намалува од месец во месец, пишува американскиот весник „Волстрит журнал“, пренесе СЕЕбиз.

Просечната држава на Европската унија е посиромашна по глава на жител од сите американски држави, освен Ајдахо и Мисисипи, се вели во извештајот на Европскиот центар за меѓународна политичка економија, независен тинк-тенк со седиште во Брисел.

Ако продолжат овие трендови, до 2035 година економскиот јаз и разликата во општественото богатство по глава на жител меѓу САД и ЕУ ќе биде исто толку голема како онаа меѓу Јапонија и Еквадор денес, според овој извештај.

Животот на континентот на чија уметност de vivre долго време им завидуваат странците, брзо го губи својот сјај додека Европејците секојдневно гледаат како нивната куповна моќ се топи.

Французите јадат помалку деликатеси и пијат помалку црвено вино, Шпанците штедат на маслиново масло, Финците палат сауни во ветровитите денови кога струјата е поевтина.

Во Германија потрошувачката на месо и млеко падна на најниско ниво во последните три децении, а пазарот на органска храна, кој до неодамна беше во метеорски пораст, сега е во исто толку метеорски пад.

Во Италија се свикуваат кризни состаноци поради цените на тестенините кои поскапеа двојно повеќе од инфлацијата. Во различни земји има стотици слични примери, а поради падот на потрошувачката, Европа на почетокот на годината падна во рецесија.

Сегашната состојба во која се наоѓа Европа не се случи преку ноќ. Нејзиното население старее, а освен тоа, Европејците преферираат се повеќе слободно време и пократка работна недела, што со години го забавува економскиот раст и ја намалува продуктивноста.

Потоа дојде пандемијата на коронавирус, а потоа и војната во Украина, што на крајот резултираше со нарушување на глобалните синџири на снабдување и нагло зголемување на цените на енергијата и храната.

Со цел да се зачува социјалниот мир и работните места, европските влади одлучија да ги субвенционираат работодавачите, што дополнително го влоши проблемот. Цените во продавниците пораснаа, а потрошувачите станаа уште посиромашни.

За разлика од Европејците, Американците многукратно профитираа од евтината енергија и пакетите помош што нивната влада ги насочуваше главно кон граѓаните, а не до работодавците, за да ги охрабри да ги трошат.

Европа има силна извозна индустрија на која Европејците можеа да се потпрат во минатото. Кина, која стана клучен европски пазар, исто така е во економски проблеми, кои се прелеваат во Европа.

Високите трошоци за енергија и огромната инфлација невидена од 1970-тите ја намалуваат конкурентноста на европските производители на меѓународните пазари и ги нарушуваат некогаш хармоничните работни односи на континентот. Со забавувањето на глобалната трговија, зависноста на Европа од извозот, кој сочинува половина од БДП, станува нејзина слабост, додека во САД извозот сочинува само 10 отсто од БДП.

Според податоците на Организацијата за економска соработка и развој, потрошувачката во 20 земји членки на еврозоната е намалена за околу еден процент од крајот на 2019 година. Од друга страна, во САД во истиот период порасна за речиси 9 отсто. На Европската унија сега отпаѓаат околу 18 отсто од вкупната светска потрошувачка, а САД со околу 28 отсто. Пред 15 години, ЕУ и САД сочинуваа околу четвртина од вкупната светска потрошувачка.

Приспособени за инфлацијата и куповната моќ, платите се намалени за приближно три отсто од 2019 година во Германија, 3,5 отсто во Италија и Шпанија и 6 отсто во Грција. Од друга страна, реалните плати во САД се зголемени за околу 6 отсто во истиот период.

Според податоците на ММФ, економијата на еврозоната пораснала за околу 6 отсто во последните 15 години, а на САД за дури 82 отсто.

Со оглед на зголемените трошоци за задолжување и потребата европските влади да ги зголемат воените трошоци, економистите очекуваат зголемување на даноците, што претставува дополнителен притисок врз потрошувачите.

И даноците во Европа се веќе високи во споредба со другите богати земји со околу 40-45 отсто од БДП, во споредба со 27 отсто во САД. Американските работници добиваат речиси три четвртини од платата, додека француските и германските работници задржуваат само половина од она што го заработуваат.