(Во живо) Денеска се објавува добитникот на Нобеловата награда за медицина

Сезоната на Нобелови награди за 2025 година започнува денеска со објавувањето на победниците во категоријата Физиологија или медицина.

Се очекува Нобеловото собрание во Институтот Каролинска во Стокхолм да објави кој ќе ја добие престижната награда најрано во 11:30 часот.

Нобеловата награда за физиологија или медицина може да се додели на еден научник или да се подели помеѓу двајца или тројца научници кои работеле во истата област.

Минатата година, наградата ја добија американските научници Виктор Амброс и Гари Рувкун за откривањето на микроРНК и нејзината улога во регулацијата на гените.

Наградата за медицина или физиологија традиционално ја отвора годишната недела на Нобеловите награди. Добитниците во физика, хемија, литература, мир и економија ќе бидат објавени во наредните денови.

Нобеловите награди официјално ќе бидат доделени на 10 декември, на годишнината од смртта на Алфред Нобел (1833-1896), пронаоѓачот на динамитот и основачот на наградите. Оваа година, секоја награда носи парична награда од 11 милиони шведски круни (950.000 евра).