Во Русија повикуваат на нуклеарен одговор откако Украина им уништи 13 авиони

Последиците од големиот украински напад со беспилотни летала врз руските воздухопловни бази сè уште се чувствуваат, а Москва е под зголемен притисок да одговори. Украинските власти тврдат дека најмалку 13 руски авиони се уништени, додека повеќе се оштетени, вклучувајќи бомбардери способни да носат нуклеарно оружје.

Како што известува Ивор Бенет, дописник на Скај њуз од Москва, повиците за нуклеарен напад врз Украина веќе се појавуваат во руските државни медиуми и на социјалните медиуми. „Некои тврдат дека според руската нуклеарна доктрина, овој напад би можел да оправда нуклеарен одговор, бидејќи целите биле бомбардери способни да носат нуклеарно оружје“, рече Бенет.

Од друга страна, прорежимските воени блогери изразија остри критики кон руската воена команда, обвинувајќи ја за небрежност и самодоволство. Критиката е дека авионите биле оставени на отворено, без доволна заштита, иако се наоѓаат стотици километри од украинската граница.

„Тие веруваа дека овие аеродроми се безбедни само затоа што се далеку од фронтовската линија“, вели дописник на Скај њуз. „Но, сега се зборува за можни внатрешни последици – можеби промени во военото раководство“.

Иако Кремљ сè уште официјално не коментираше за можни контрамерки, аналитичарите и набљудувачите предупредуваат дека Русија речиси сигурно ќе одговори – воено, дипломатски или и двете. Обемот и природата на тој одговор останува да се види, но е јасно дека нападот сериозно го поткопа чувството за безбедност на руските стратешки сили длабоко на територијата.