Со кревање на макфестовското знаме и официнално почна 37.издание на Фестивалот на забавни мелодии „Макфест“. Организаторите и покровителите на денешната прес-конференција објавија целосна подготвеност за првата вечер која започнува од 20 часот. Александар Арсовски од Општина Штиш вели дека вечерва публиката ќе може да ужива во 12 композиции.
-Општина Штип како организатор и покровител на „Макфест“ оваа година навремено и во целост ги заврши подготовки за почеток на истиот. Со задоволство ве известуваме дека очекуваме многу нови хитови, истакна Арсовски.
Новиот концепт не ги вклучува стандардните награди, со што Фестивалот нема да биде од натпреварувачки карактер, туку ќе има за цел да произведе квалитетни мелодии кои ќе останат запаметени и слушани. Уметничкиот директор, Роберт Саздов, најавува успешно 37. издание, а какошто вели со нова димензија.
-Би сакал да ја пофалам организацијата. Не сум бил на сите 37 изданија, меѓутоа ова што сега го гледаме навистина е феноменално. Се’ функционира какој швајцарски часовник. Што се однесува до уметничкиот дел, ние едногласно се одлучивме за еден концепт, којшто ќе го направи ова издание посебно. Ние го носиме новиот сјај, не го враќаме стариот, стариот останува во историјата, нашата идеја и реализација е за една нова димензија и тоа не водеше, вели Саздов.
Гостин од странство е Ален Исламовиќ, кој ќе настапи в сабота, кога ќе ја промовира новата песна „Судњи дан“ со која го најавува својот нов албум.
– Со Ален стапивме за пет минути во контакт, а мислам дека за уште пократко време ја прифати нашата понуда да учествува на фестивалот. Сите добро знаеме колку значи неговото име за југословенската поп-рок сцена и поради тоа ни претставува чест и привилегија што ќе биде дел од 37-то издание на фестивалот. Ален издава и нов албум и мислам дека го побаравме во вистинско време. Првиот сингл од албумот тој ќе го промовира токму на „Макфест“, рече Саздов.
Според познатиот македонски композитор и продуцент Јован Јованов, член на Уметничкиот совет на фестивалот, новото издание ќе биде вистинско освежување на македонската естрадна сцена. Тој, специјално за „Макфест“ допатува од Канада, каде што е веќе десетина години .
– „Макфест“ има големо значење за македонската музика и мене ми е посебно драг, зашто токму тука во Штип јас ја започнав својата музичка приказна со групата „Магија“ во далечната 1998 година, кога победивме со истоимената песна и, како што сите искоментираа, донесовме нов ветер на фестивалот. Драго ми е што годинава учесниците се фокусирани на песната и настапот, а не на победата. Воведувањето ревијален карактер ќе им даде голема слобода на учесниците од креативен аспект , изјави Јованов.
Градоначалникот на Општина Штип, Иван Јорданов потсети дека на Фестивалот ќе има различна музика за сечиј вкус, па затоа нема да биде трка за награди, туку промоција на добра музика.
-Се е подготвено за Штип наредните два дена да биде епицентарот на македонската забавна музика. Штип ќе пулсира во знакот на „Макфест“. Она коешто на мое огромно задоволство ќе се случува е нов концепт, коешто ќе го одбележи новото време. Мелодиите ќе дадат една вредност во забавната музика во Македонија. Сето она што го припремавме сега нашите сограѓани и гостите ќе имаат можност да го слушнат во Штип“, истакна Јорданов.
„Макфест“ е финансиран со шест милиони денари од Општина Штип и спонзори, поддржувачи и пријатели. Општината нема да претрпи финансиски загуби, тврди градоначалникот, а средствата се доволни за достојно одржување на Фестивалот.
Маријана Стојановска и Димитар Атанасовски се најавени како главни водители, а презентери ќе бидат Лила Филиповска, Миланка Рашиќ и Јана Бурческа. Македонската телевизија ќе врши директен пренос од двете фестивалски вечери.
