(Видео) Украинците првпат погодија руски танкер во Средоземното Море
Бродот со оманско знаме наводно бил погоден во водите југоисточно од Грција
Украина првпат погоди руски танкер во Средоземното Море, изјави извор од украинската разузнавачка служба за новинската агенција Ројтерс. Танкерот „Кендил“ е дел од руската „флота во сенка“, група застарени танкери кои ѝ овозможуваат на Москва да го одржува извозот на сурова нафта и покрај западните санкции, пишува „Телеграф“.
Украински функционер тврди дека украинските дронови го погодиле бродот на локација оддалечена повеќе од 2000 километри од Украина, предизвикувајќи значителна штета.
Бродот со оманско знаме наводно бил погоден во водите југоисточно од Грција.
Бродот бил празен во времето на нападот, додаде украинскиот извор. Изворот, исто така, тврди дека станува збор за „нова, невидена специјална операција“. Според него, танкерот бил легитимна цел.
https://twitter.com/i/status/2001975031262556646
„Државата агресор го користеше овој танкер за да ги заобиколи санкциите и да заработи пари за финансирање на руската воена машинерија. Од гледна точка на меѓународното право и законите и обичаите на војување, ова е апсолутно легитимна цел за СБУ. Непријателот мора да разбере дека Украина нема да застане и ќе го победи каде и да се наоѓа во светот“, рече тој.
Според платформата Vessel Finder, танкерот последен пат се закотвил во пристаништето Суец во Египет на 16 декември. Крајната дестинација на танкерот е наведена како Порт Саид на северниот брег на Египет, каде што требаше да пристигне на 21 декември.