Вархеи ги почна разговорите во Софија со Борисов

Претседателот на ГЕРБ, Бојко Борисов се состанал утрово со еврокомесарот за проширување на ЕУ,  Оливер Вархеи, во седиштето на партијата. Главниот фокус на разговорот бил Договорот за пријателство, добрососедство и соработка меѓу Бугарија и Република Северна Македонија.

Притоа, Борисов ја истакнал клучната улога на Бугарија во враќањето на темата за европска интеграција на Западен Балкан во агендата на Унијата. Лидерот на ГЕРБ повторил дека европската иднина на овој стратешки регион е гаранција за мир и просперитет, како и превенција од влијанието на другите сили. Тој истакнал дека Европа мора да продолжи да работи активно на европските интеграции на Република Северна Македонија и Албанија, имајќи ги предвид позициите на секоја земја.

Двајцата разговарале и за проширување на транспортната и дигиталната инфраструктура на земјите во регионот.

„Убеден сум дека оваа инфраструктура е еден од факторите за одржлив развој на сите земји. Затоа, за време на бугарското претседателство со ЕУ, како и во рамките на Берлинскиот процес, ние се фокусиравме на поврзаноста. Создавањето услови за економски просперитет придонесува и за развој и добрососедски односи. Важно е да не се запре работата на специфични инвестициски проекти за регионална инфраструктура во областа на енергетиката, транспортот итн., бидејќи тие го подобруваат животот на граѓаните “, рече Борисов, цитиран од партискиот прес-центар.

„Интересен за целиот регион и за европската безбедност е целокупната изградба на Коридорот 8, што ќе овозможи поврзување на Црното со Јадранското Море“, рекол Борисов. Тој додал дека Бугарија е на раскрсница на Балканот и затоа не само за нашата земја, туку и за целата ЕУ, ќе биде корисно да се градат гасни интерконекции во регионот со соседните земји. Тие ќе придонесат за безбедноста и диверзификацијата на снабдувањето со енергија во Европа.