Урсула фон дер Лајен ја основа шпионската служба на Европската Унија: Дипломатите предупредуваат за скриени мотиви

Претседателката на Европската комисија, Урсула фон дер Лајен, планира да формира разузнавачка служба на Европската Унија која би користела податоци од националните служби на земјите-членки, со цел подобрување на нивната оперативна употреба и зајакнување на нејзиното политичко влијание, јавуваат меѓународните медиуми.

Претседателката на Европската комисија, Урсула фон дер Лајен, размислува за формирање на специјална разузнавачка единица во рамките на Европската комисија која би собирала и анализирала информации од националните безбедносни структури на земјите-членки. Европската комисија објави дека новата служба треба „подобро да ги користи постојните податоци на оперативно ниво“, додека дипломатите во Брисел го гледаат овој потег првенствено како начин претседателката на Комисијата да ги прошири своите овластувања.

Портпаролката на Комисијата, Паула Пињо, изјави дека новата единица ќе „ја надополни работата на Европската служба за надворешни работи“ и ќе игра важна улога во подготовката на таканаречениот Безбедносен колегиум, тело составено од 26 комесари и претседателот на Комисијата. Ова тело се состана за прв пат во март, кога Европската комисија го прошири својот безбедносен мандат.

Сепак, планот беше критикуван од високи европски дипломати кои предупредуваат дека формирањето на новата структура би можело да доведе до паралелни системи на моќ во Брисел и да предизвика судир на надлежности. Некои стравуваат дека таков развој на настаните би можел да го загрози нивното влијание и кариери.

Планот сè уште не е официјално презентиран на земјите-членки, но предвидува можност националните разузнавачки служби да делегираат дел од својот персонал во новата европска единица. Два информирани извори изјавија дека се очекува отпор од европските престолнини кон давањето нови разузнавачки овластувања на Брисел.