Урбано дивеење во Маврово и покрај забраната на Уставниот суд

Да се спречи урбаното дивеење во Маврово, бараат од здужението „Спас за Маврово“ во јавниот повик до надлежните институции.

„Во периодот од октомври 2024 до февруари годинава градоначалникот на Општина Маврово Ростуше Медат Куртовски потпиша триесетина решенија за одобрување на изградба на викенд куќи, хостели, пансиони и згради со апартмани и студија апартмани, традиционални куќи за потребите на туризмот (селски, планински, езерски) околу Мавровското Езеро. Оваа негова одлука доаѓа и покрај донесеното решението (од мај 2024 година) на Уставниот суд за укинување на урбанистичките планови во овој регион“, се вели во соопштението на здружението за заштита на животната средина „Спас за Маврово“.

Според нив на националниот парк му се случува дивеење и бетонизација.

„Во услови кога веќе неколку години по ред алармираме на бетонизацијата на Мавровското Езеро, на изградените згради надвор од сите норми за објекти во Национален парк, предупредуваме на огромните проблемите со инфраструктурата (пат, водоводна мрежа, напојување со електрична енергија). Општината без никаква резерва потпишува согласности за изградба на нови и нови објекти. Тоа се прави и покрај тоа што уште лани во мај Уставниот суд ги укина урбанистичките планови донесени од советите на поранешната општина Маврови Анови и на Општината Маврово и Ростуше од 2001 односно од 2015 година. Исто така треба да се има предвид дека е во тек постапката за ревалоризација на заштитеното подрачје Национален парк Маврово, во која е вклучено и зонирањето на паркот каде ќе бидат точно дефинирани градежните активности.

Законската можност за издавање на вакви одобрувања за парцели надвор од опфатот на урбанистичките планови едноставно не може да биде никакво оправдување ако се знае ситуацијата на теренот. А, таму градоначалникот Куртовски очигледно ретко оди и без никаков проблем ги потпиша овие решенија неколку месеци пред крајот на неговиот мандат. Без ни малку обид конечно да покаже достоинство, морал, чест и барем еднаш да направи нешто за мавровскиот регион кој во неговиот мандат едноставно беше заборавен и злоупотребен.
Ги повикуваме надлежните органи  итно да го спречат ова самоволие на градоначалникот Куртовски кое непрекинато се спроведува изминатите години, а кое допринесува до урбано дивеење со несогледливи последици“, соопшти „Спас за Маврово“.