Унгарски воен авион не доби дозвола да слета во Босна и Херцеговина

Босанскиот министер за одбрана Зукан Хелез му забрани на унгарски воен авион да слета во Босна и Херцеговина. Министерот на својата страница на Фејсбук напиша дека авионот сакал да слета прво на Сараево, а потоа и на аеродромот во Бања Лука, но не добил дозвола.

„Одбив да дадам согласност за воен авион од Унгарија да прелета/слета во Босна и Херцеговина. Се бараше согласност за слетување на воен авион на аеродромот во Сараево, а потоа и на аеродромот во Бања Лука.

Зошто воен авион мораше да слета на аеродромот во Бања Лука, останува нејасно, но во контекст на пристигнувањето на 70 припадници на специјалната антитерористичка единица на унгарското Министерство за внатрешни работи за поддршка на Министерството за внатрешни работи на РС, во овој момент секако е симптоматично.

Унгарскиот премиер Виктор Орбан постојано го поддржува претседателот на помалиот босански ентитет, Милорад Додик, во неговиот напад и поткопување на уставниот поредок на Босна и Херцеговина. Длабоко сум убеден дека пристигнувањето на воениот авион од Унгарија имаше за цел да му даде некаква поддршка на Милорад Додик и кликата собрана околу него во разбивање на Босна и Херцеговина.

Поради моето одбивање да дадам согласност за гореспоменатото прелетување/слетување на воен авион, изминатите 3 дена бев под огромен притисок, како од делови на меѓународната заедница, така и од домашни посредници.

Ништо не е поважно од Босна и Херцеговина, ниту јас, ниту мојата позиција.

Со оглед на тоа што претседателот на помалиот босански ентитет Милорад Додик постојано вели дека Босна и Херцеговина не е држава, дека РС е држава, прашувам зошто неговиот воен авион не слета во Бања Лука“, напиша Хелез.

Унгарскиот медиум „444“ објави дека станува збор за авион на државниот секретар за надворешни работи, Левенте Маѓар. „На 3 март, државниот секретар за надворешни работи, Левенте Маѓар, требаше да отпатува во Сараево и Бања Лука на официјална средба. Откако босанската влада не даде дозвола за летот, само посетата на Бања Лука се вклопи во расположливата временска рамка. Бараме можност да одржиме консултации во Сараево“, соопшти унгарското Министерство за надворешни работи.