Ученици од земјава преку роботиката бараат решенија за преживување на Марс

„Можеме ли да преживееме на Марс?“, одговорот на ова прашање, ќе се обидат да го најдат, со помош на роботиката, учениците од неколку земји кои учествуваат на првиот Медитерански СТЕМ натпревар што се одржува во Атина, а меѓу нив и околу 20 ученици од македонската СТЕМ Академија, јави дописничката на МИА од Атина.

Учениците во македонските тимови се на возраст од осум до 12 години се натпреваруваат во две категории, а поделени се во пет тима, два во помала и три во поголема категорија и имаат различни задачи и предизвици за кои со помош на роботиката со лего коцки, треба да најдат решенија на прашањата како што се изградба на метеоролошка станица, создавање енергија, но и садење храна на Марс.

Дописничката на МИА од Атина го посети Медитеранскиот СТЕМ натпревар што се одржува во просторот на саемот во северниот дел на Атина, каде што од рано утрово, веднаш по свеченото отворање, учениците од земјите учеснички С. Македонија, Црна Гора, Бугарија, Либан, Кипар, Египет, како и домаќинот Грција, внимателно и посветено, во рамките на нивните тимови, работат на дадената задача, додека судиите ненајавено ги посетуваат за да ги слушаат нивните објаснувања за понудените решенија.

Задоволство од учеството, но и надеж за успех, изразуваат и нашите ученици, но и тренерот-едукатор на македонските тимови Љупчо Јованов и извршниот директор на македонската СТЕМ Академија Жарко Поп-Илиев, кои воедно ги објаснуваат правилата и предизвиците на натпреварот, но говорат и за неколкумесечните подготовки на учениците.

Едукаторот Јованов посочи дека со оглед на тоа што тематиката е „Дали можеме да преживееме на Марс“, задачата на секој тим е да формира проект што ќе реши даден проблем за да го населиме Марс.

– Секој тим одбра по една проблематика и во поголемата категорија, треба да направи две или четири автоматизации што вклучува мерење на некоја величина и вклучување на некој мотор за да изврши дадена задача. Во помалата категорија е малку поедноставно, бидејќи бараат само една автоматизација која вклучува мотор и еден сензор, а останатите се рачни механизми соодветно за возраста. Така што, мораше, кога се решаваа проблемите да има сеопфатен пристап за да можеме да изготвиме различни автоматизации и дополнително имавме ограничувања дека мора да користиме и видеокамера како сензор, микро бит кој ќе мери различни величини и сето тоа да биде прикажано со програмски код и да имаме дури за едното автоматизација и компјутерска анимација за да се видат вештините во програмирање на самите деца, објасни Јованов.

Додаде дека подготовката била долготраен процес, односно околу три и пол месеци интензивна работа од четири-пет часа за време на викендите, а се користело претходното знаење на децата со лего коцки, со сензори, со мотори и сл., а дополнително бил воведен и микро бит за мерење на физички величини, читање на графички приказ и слично за да се добие решение на некој проблем.

Директорот на СТЕМ Академија за МИА коментираше дека е навистина импресивно она што децата го научија во целиот процес на подготовки и напорна работа во изминатите три-четири месеци.

– Се користат најразновидни технологии, не е само лего, туку напротив многу open source технологија којашто е подостапна и поевтина во светски рамки. Се користат дополнителни напредни знаења, во овој случај на пример темата е „Како да се преживее на Марс?“, што е многу интересна тема. Децата прво правеа истражување околу темата, па потоа врз основа на тие истражувања осмислуваа одредени проекти, иновативни проекти коишто ќе ги презентираат и на крај ги прават проектите и секој проект треба да исполни одредени технички барања. Треба да има одредени автоматизации, треба да има одредени роботски елементи итн. кои се предвидени од самиот организатор, објасни Поп-Илиев.

Сите тимови имаат и свое име, а дописничката на МИА од Атина поразговара со три од вкупно пет македонски тима, кои ги објаснија нивните задачи, коментирајќи дека во текот на подготовките се соочиле со помали проблеми, но успеале брзо да најдат решенија.

Влатко, Камелија, Анја, Кипријан, Рубен и Давид се „The red storm“, тимот што треба да создаде енергија на Марс.

„Future stars“, односно Дамјан, Мила, Глигор, Алексеј е тимот задолжен за создавање метеоролошка станица на Марс за заштита на оние кои ќе живеат таму, додека пак „Space explorers“ се Дамјан, Матеа, Елени, Бојан, Марко, кои работат на проект за садење и негување на храна на Марс.

Дел од децата се надеваат на награда, дел пак поскромно велат дека и самото учество им е големо искуство.

Од друга страна извршниот директор на СТЕМ Академијат, кој е дел и од бордот на директори на СТЕМ Асоцијацијата која го организира Медитерански натпревар, вели дека иако во нивното 14-годишно постоење имаат низа награди на меѓународни натпревари, сепак постојат многу други и поважни работи со кои се стекнуваат децата

– Пред сè, тука е учењето, искуството, соработката. Тоа се основните принципи врз кои се гради сето ова. Наградите, да, убави се, но доаѓаат како резултат на посветеност, а ние повеќе сме фокусирани на процесот отколку на тоа дали ќе се добие награда или не. Повредна е возбудата, тимската работа. Оние работи кои децата ги стекнуваат низ целото тоа, не само знаењето знаењето, туку и оние вештини за социјализација, за решавање на проблеми, критичкото расположение, самодоверба, бидејќи треба да презентираат пред судии, каде што треба да одговараат на прашања, да не се блокираат, тоа се многу елементи кои, барем за мене, се многу поважни, посочи Поп-Илиев.

Во однос на тоа колку роботиката е популарна кај нас, извршниот директор на СТЕМ Академијата објасни дека привлекува внимание меѓутоа потребно е да се работи на вистински начин, не е само да се работи туку да се работи со одредена методологија, на прав начин со искрени желби.