Турција ќе се откаже од руските системи „С-400“ за да ги добие борбените авиони „Ф-35“

Турција сака да купи нова генерација ловци „Ф-35“ од Соединетите Држави за да стекне супериорност над грчката авијација, пишува весникот „Џумхуриет“, повикувајќи се на информирани извори. Според изданието, за време на преговорите за враќање на програмата за снабдување со „Ф-35“, Анкара му кажала на Вашингтон дека нема да ги активира системите за противвоздушна одбрана С-400 купени од руска страна за да набави воени авиони. Турција ги купи овие системи од Русија за 2,5 милијарди долари, но тие никогаш не беа ставени во функција и сè уште се чуваат во турски магацини, забележува весникот.

Висок претставник на американската амбасада во Анкара не ја демантираше оваа информација. „Сега топката е во теренот на Турција, таа добро ги знае барањата за купување на ‘Ф-35’“, рече тој во разговор со весникот.

Во 2017 година, Москва и Анкара потпишаа договор вреден 2,5 милијарди долари за набавка на системи „С-400“. Вашингтон се обиде да го спречи овој договор, па дури и ја исклучи Турција од програмата за снабдување со најновите ловци „Ф-35“. Сепак, тоа не помогна: ракетните системи беа испорачани на Турција во летото 2019 година.

Минатата пролет, заменик-државниот секретар на САД, Венди Шерман, рече дека купувањето на „С-400“ од Анкара е „долгогодишен проблем“ и „можеби ова е моментот кога можеме да најдеме начин да го решиме овој проблем“. Таа не прецизираше на што мисли.

Во март 2022 година Ројтерс објави, цитирајќи информирани извори, дека Соединетите Држави неформално разговарале со Турција за можноста за испраќање руски „С-400“ во Украина. Вашингтон вети дека ќе ја врати Анкара во програмата за снабдување со „Ф-35“, но на крајот страните не постигнаа никаков договор за ова прашање. Според агенцијата, Турција можеби го сметала предлогот на САД за несоодветен поради нејзината неподготвеност да ги наруши односите со Русија.