Тајландскиот суд ја разреши премиерката Шинаватра

Уставниот суд на Тајланд ја разреши Паетонгтарн Шинаватра од нејзината позиција како премиер, пресудувајќи дека како лидер на земјата ги прекршила уставните правила за етика во телефонскиот разговор со претседателот на сенатот на Камбоџа, Хун Сен.

Пресудата, која најавува нов период на нестабилност во земјата, значи дека таа веднаш ја губи работата, која ја извршуваше околу една година. 39-годишната жена веќе беше суспендирана од своите должности на 1 јули откако беше протечена снимка од нејзиниот телефонски разговор со Хун Сен, во која разговарале за тлеечкиот граничен спор меѓу соседните земји.

Критичарите ја обвинија дека не ги заштитила интересите на Тајланд за време на повикот, во кој таа му се обрати на Хун Сен со „чичко“ и му рече дека ако има нешто што тој сака, таа ќе „се погрижи за тоа“. Таа, исто така, даде критички забелешки за висок тајландски воен командант.

Паетонгтарн, ќерка на милијардерот и поранешен тајландски лидер Таксин Шинаватра, се извини за своите коментари, опишувајќи ги како преговарачка тактика. Сепак, протечениот разговор создаде голема политичка криза за нејзината влада, само една година откако таа ја презеде функцијата.

Коалициски партнер ја напушти нејзината влада во јуни, оставајќи ја со само мало мнозинство, додека илјадници демонстранти излегоа на улиците на Бангкок, барајќи нејзина оставка.

Случајот од петокот произлезе од петиција поднесена во јуни од група сенатори, во која се бараше таа да биде отстранета од функцијата, обвинувајќи ја за недостаток на интегритет и кршење на етичките стандарди.

Повикот не само што ја фрли владата на Паетонгтарн во хаос, туку означи и значително влошување на тајландско-камбоџанските односи. Неколку недели откако беше протечена снимката, граничниот спор избувна во петдневен конфликт во кој беа убиени десетици луѓе, а стотици илјади беа раселени.

Гневот поради телефонскиот повик и справувањето на Паетонгтарн со граничната криза е влошен од перцепцијата дека личниот однос на нејзиното семејство со Хун Сен ги поткопува и се меша во националните интереси на Тајланд.

Целосната верзија на снимката беше објавена од Хун Сен, кој исто така се закани дека ќе објави дополнителни компромитирачки информации за таткото на Паетонгтарн, Таксин. Познато е дека Хун Сен бил стар пријател на Таскин, иако, од непознати причини, тие сега се заглавени во горчлива караница.

Петонгтарн е четвртиот член на нејзиното семејство чиј мандат е скратен или со воен удар или со судска одлука. Таксин беше соборен со воен удар во 2006 година, додека во 2008 година, зет му на Таксин, Сомчаи Вонгсават, кој кратко време беше премиер, исто така беше принуден да се повлече од власт со судска одлука. Во 2014 година, сестрата на Таксин, Јинглак, беше соборена со судска одлука, проследена со воен удар.

Семејството, кое е во криза со години, е заглавено во борба за власт со воениот ројалистички естаблишмент на Тајланд, иако неговиот опстанок е загрозен и од падот на поддршката кај гласачите.