Шон Пен запали цигара на доделувањето на Златните глобуси 2026

Актерот Шон Пен беше фотографиран како пуши цигара во салата за време на 83-то доделување на Златните глобуси, иако пушењето е забрането таму. 65-годишниот актер запали на маса во „Беверли Хилтон“, каде што седеше до Леонардо Дикаприо.

Фотографиите од настанот го покажуваат како ги гаси опушоците од цигари во празна чаша на масата. „Венити фер“ објавува дека другите гости, кога сакале да запалат, барале надворешен простор, додека Пен едноставно ја запалил цигарата во салата, на својата маса. „Неколку гости побарале простор за пушење надвор од салата. Но, еден режисер ми рече дека го видел како едноставно пали цигара во салата, токму на својата маса“, пишува „Венити фер“.

Се појавува фотографија
Бен Фриц, новинар кој го следи шоу-бизнисот, сподели фотографија од Пен покрај Дикаприо и Кејт Хадсон на социјалните мрежи со натпис: „Ова не може да биде легално“.

Коментарите беа полни со шеги и забелешки како: „Тој е озлогласен пушач. Прилично сум сигурна дека му било дозволено да пуши како услов за да дојде“. Други додаваа: „Ако си Шон Пен, можеш да го направиш тоа“, „Тој е како скапоцен дух од стариот Холивуд, дозволи му да го живее својот живот како што сака“ и „Тој е човек кој може да прави што сака“.

Пен беше и тема на воведните шеги на водителката Ники Глејзер. „Чувствувам дека многу актери само раскажуваат приказни, но Шон Пен всушност ќе оди на места во светот каде што е најпотребна помош – и ќе користи кокаин. И чувствувам дека не го цениме тоа доволно“, се пошегува таа. Пен се смееше, дури и кога Глејзер додаде дека добила одобрување за шегите од неговите „најдобри пријатели“ Чарли Шин и Ел Чапо.

Ова не е прв пат актерот да ги прекршува правилата за пушење јавно. Тој пушеше за време на интервју со Стивен Колбер во 2018 година, како и на Меѓународниот филмски фестивал во Маракеш во 2024 година.