Седум лица загинаа во Цетиње, полицијата трага по Ацо Мартиновиќ, кој си ги убил и родителите

Седум лица, меѓу кои две деца, загинаа во масовно убиство што се случи попладнево во Цетиње, Црна Гора.

Полицијата трага по Ацо Мартиновиќ од Цетиње. Полицијата објави иницијали на три од жртвите: М.В., Р.М. и Б.М. Според медиумите тој ги убил своите мајка и татко, кои се меѓу жртвите.

Во Клиничкиот центар се примени четири лица за кои се верува дека биле ранети од осомничениот Мартиновиќ.

Радовиќ: Кај сите пациенти повредите се многу сериозни и опасни по живот
Директорот на Клиничкиот центар Александар Радовиќ изјави дека во последните четири часа биле донесени четворица пациенти, една жена и три машки.

„Кај сите пациенти повредите се многу сериозни и опасни по живот, кај еден пациент имаме повреда на главата, градниот кош, абдоминална повреда, кај двајца пациенти имаме повреда на абдоменот, а кај еден пациент исто така до градите и стомакот.

Мобилизирани се сите лекари на повик и готовност, а секако реагираа и други колеги.

Значи имаме и неврохирургија и васкуларна хирургија, вклучени се уролози, така што во овој момент не би можел да коментирам за исходот од операциите“, рече тој.

Тој додава дека се во постојана комуникација со полицијата, а засега немаат информации дека некој друг оди во Клиничкиот центар.

Пукање по тепачка

Мартиновиќ пукањето го започнал во кафаната „Велестово“, во близина на Спортскиот центар.

По злосторството во таа кафана, тој го продолжил крвавиот пир.

„Вијести“ пренесува дека  во тој локал најпрвин се случила тепачка, по што бараниот извадил оружје и пукал.

Полициската управа упати апел до граѓаните на Цетиње да останат присебни и да останат во своите станбени објекти, додека сите расположливи полициски единици се на терен и преземаат активности од нивна надлежност со цел да ја стават ситуацијата под контрола и кривично да ги гонат сторителите.

„Ја информираме јавноста дека се работи за ситуациски настан, кој не е резултат на разбивање на високоризични организирани криминални групи“.

Милатовиќ: Шокиран сум и потресен од трагедијата што го зави Цетиње во црно

„Наместо празнична радост, тагата за загубата на невини животи го зафати нашиот главен град и цела Црна Гора“, напиша на интернет претседателот на Црна Гора Јаков Милатовиќ.

„Шокиран сум и потресен од оваа трагедија која нашето Цетиње го претвори во мрак, семејствата и пријателите на жртвите, на кои им изразувам искрено сочувство. Се молиме и се надеваме на оздравување на сите ранети. Нашите мисли вечерва се со семејствата кои ги загубија своите најблиски и граѓаните на Цетиње. Цела Црна Гора ја чувствува и ја споделува вашата болка“, рече Милатовиќ.

Поради трагедијата во Цетиње прогласена е тридневна жалост

Владата на Црна Гора апелира до општините да ги откажат настапите и концертите закажани за вечерва (1 јануари).

По повод трагичниот настан што се случи денеска во Цетиње, Владата на Црна Гора на итна телефонска седница донесе одлука 2, 3 и 4 јануари да ги прогласи за Денови на жалост, соопшти Владата.

„Ужасна трагедија која не погоди сите нас. Сите расположливи единици се во Цетиње и трагаат по сторителот. Се надевам дека лекарите ќе ги спасат животите на ранетите, кои се во тешка состојба. Ќе одржиме и седница на Советот за национална безбедност на која ќе разгледаме бројни опции, вклучително и целосна забрана за поседување оружје, бидејќи после ова треба да се запрашаме кој може да смее да поседува оружје во Црна Гора“, рече премиерот Милојко Спајиќ во оваа прилика.