СДК: Непрописно паркираното „порше“ на Боемска било на Керим, в кафеана бил со сопругот на претседателката

Автомобилот „порше“, кој на 22 март беше непрописно паркиран на велосипедска патека во скопско Дебар Маало, бил возен од поранешниот министер за надворешни работи Срѓан Керим. Откако видеото во кое се гледа дека пајак службата и полицијата не сакаат да го кренат возилото беше објавено на социјалните мрежи и предизвика низа реакции во јавноста, граѓани пишуваат дека „поршето“ е на Керим кој во тој момент бил во една од кафеаните на популарната Боемска улица.

Очевидци велат дека Керим тогаш бил во друштво со сопругот на претседателката Гордана Сиљановска-Давкова, Благој Давков. Полицаецот во видеото вели дека колата е на полициски службеник на должност, пренесе СДК.

Керим за порталот Скопје1 кратко потврди дека тој е сопственик на возилото, на останатите прашања не одговорил кратко потенцирајќи дека е постапено по закон.

„Нема потреба од никакви коментари. Постапено е според позитивните прописи што важат во вакви случаи“, вака накратко за порталот Скопје1 одговори поранешниот министер за надворешни работи и амбасадор, Срѓан Керим, откако беше прашан за несовесното паркирање на луксузно „порше“ во скопската населба Дебар Маало.

Возилото, кое предизвика бројни реакции во јавноста, не е сопственост на полициски службеник, како што првично се шпекулираше, туку токму на Керим.

Инфирмацијата ма Министерството за внатрешни работи (МВР) го потврди ова, бидејќи во неа стои дека на возачот со иницијали С.К. му бил издаден платен налог.

Случајот уште еднаш отвори многу прашања, пред се почитувањето на законот и привилегиите на јавни личности и поранешни функционери, дури и оние во пензија.

Утрово на социјалните мрежи се појави видео на кое што се гледа како граѓани се расправаат со вработени во Пајак-службата кои одбија да отстранат неправилно паркирано возило на велосипедска патека пред ресторан во скопската населба Дебар Маало.

Од СДК  испратиле прашања и до Кабинетот на претседателката Гордана Сиљановска-Давкова, дали обезбедувањето на сопругот Благој Давков спречило да се подигне возилото на Керим. Од таму им одговориле да се обратат во МВР.

„Кабинетот на претседателката Гордана Сиљановска-Давкова не е дел од овој настан. Случајот е во надлежност на Министерството за внатрешни работи, каде, според информациите коишто се јавно објавени, веќе се постапува“, одговориле од Кабинетот на Сиљановска-Давкова на прашањето на СДК дали обезбедувањето на сопругот на председателката спречувало пајакот да го дигне поршето паркирано на патеката за велосипеди.

Керим беше министер за надворешни работи во Владата на Љубчо Георгиевски и претседавач на 62. заседание на Генералното собрание на Обединетите нации во 2007-2008. Беше еден од двајцата осомничени во случајот на СЈО за кривични дела за компанијата Медиа принт Македонија (МПМ) во која што беше директор.

СДК потсетува дека откако од сопствеништвото на МПМ се повлече Орка холдинг на бизнисменот Орце Камчев, Керим беше единствениот сопственик на фирмата која ги издаваше дневните весници „Вест“, „Утрински“ и „Дневник“ и магазинот „Теа Модерна“.

По престанување со излегување на весницитебез работа останаа над 300 новинари, печатарски работници и придружни службеници.

СДК исто така потсетува и дека во 2010, беше откриено дека возачот на Керим во МПМ во март 2008 бил фатен на унгарската граница во обид да изнесе кеш од 750.000 евра скриени во шише од кола-кола.

Во мај 2021, Керим беше меѓу 26-те членови на Стратешкиот совет за надворешна политика, како советодавно тело на Министерството за надворешни работи (МНР) формирано од министерот Бујар Османи.