САД и Ерменија потпишаа договор за стратешко партнерство

САД и Ерменија, која досега беше во блиски сојузнички односи со Русија, потпишаа договор за стратешко партнерство, пренесуваат агенциите.

Американскиот државен секретар Ентони Блинкен и неговиот ерменски колега Арарат Мирзојан го потпишаа договорот на церемонија во Вашингтон. Блинкен го опиша документот како камен-темелник за соработка на полето на економијата, одбраната, безбедноста и демократизацијата.

Договорот предвидува американска помош за економски и воени реформи во поранешната советска република, додека Вашингтон ја уверува Ерменија за нејзината поддршка за зачувување на суверенитетот и неповредливоста на нејзините граници. Ова е особено важно за властите во Ереван со оглед на конфликтот со соседен Азербејџан, кој има поддршка од Турција.

За возврат, Ерменија е посветена да се придржува кон демократизацијата и владеењето на правото.

Односите на Ерменија со Русија, која традиционално се смета за заштитник на Ерменија во регионот, се заладија по инаугурацијата на прозападниот премиер Никол Пашинјан во мај 2018 година.

Ереван неодамна се огради од воената алијанса Организација на Договорот за колективна безбедност, во која Москва игра водечка улога, а Ерменија е еден од основачите. Русија продолжува да одржува воена база во Ерменија.

Во вторникот, Москва го обвини Вашингтон дека игра дестабилизирачка улога во Јужен Кавказ.

„САД никогаш не одиграле особено стабилизирачка улога во Јужен Кавказ, токму спротивното“, рече портпаролот на Кремљ, Дмитриј Песков. Тој го обвини Вашингтон дека се обидува да преориентира повеќе земји кон својата агенда.

Песков истакна дека Ерменија има право да ги диверзифицира своите врски и рече дека Москва останува заинтересирана за добри односи со поранешната советска република. Наспроти ова, Ерменија игра клучна улога како посредник за увоз на голем број западни стоки и електронски компоненти во Русија по воведувањето на санкциите поради војната во Украина.