Разговорите за Кипар пропаднаа – уште еднаш, соопштија ОН
Генералниот секретар на ОН изјави дека следниот состанок ќе се случи „во блиска иднина“
Тридневните разговори меѓу кипарските водачи не дадоа доволно заеднички јазик за да продолжат формалните разговори за решение, соопштија Обединетите нации во четвртокот.
Овонеделниот самит во Женева – во кој беа вклучени владите од обете страни на поделениот остров и земјите гаранти Грција, Турција и Велика Британија – беше првиот откако пропаднаа разговорите во 2017 година
„Вистината е дека на крајот од нашите напори, сè уште не најдовме доволно заеднички јазик за да дозволиме продолжување на формалните преговори“, рече генералниот секретар на ООН Антонио Гутереш на прес-конференција.
Но, тој додаде дека „нема да се предаде“ и дека страните се согласиле да одржат уште еден состанок со цел изнаоѓање заеднички јазик „во блиска иднина“.
Повеќекратни обиди за решавање на кипарскиот конфликт не успеваат откако инвазијата на Турција во 1974 година го подели островот на кипарски грчки југ – меѓународно призната Република Кипар, земја членка на ЕУ – и турскиот Северен Кипар, чија државотворност ја признава само Анкара.
Очекувањата за напредок на самитот оваа недела беа мали. По изборот на кандидатот кој е против обединување Ерсин Татар за претседател минатата година, владата на кипарските Турци и нејзините сојузници во Анкара ги засилија повиците за решение со две држави. Република Кипар и Грција продолжуваат да го поддржуваат обединувањето.
„Ова не беше лесен состанок“, призна Гутереш. Тој додаде: „Ние сме решени да сториме сѐ што можеме за да продолжиме понатаму“ и дека напорите ќе продолжат „да се создадат најдобри можни услови за следниот состанок, што може да се случи во следните два до три месеци“.
Татар рече дека нема смисла да се одржуваат формални разговори без признавање на Турската Република Северен Кипар како држава и дека нема да се откаже од предлогот за две држави.
Кипарскиот претседател Никос Анастасијадес рече дека овој предлог никогаш нема да биде прифатен. „Нема една единствена шанса Турција или страната на кипарските Турци да успеат во ова. Ова беше нешто што беше посочено од генералниот секретар на ОН“, рече тој. (Според агенциите)