Путин бара од Украинците да земат руско државјанство или да се преселат на друго место

Рускиот претседател Владимир Путин почна да врши притисок врз Украинците во Русија и на окупираните територии во нивната матична земја да земат руско државјанство или да се преселат на друго место, соопштија во саботата британските разузнавачи.

Путин во четвртокот потпиша указ со кој се обврзуваат украинските граѓани кои живеат на територии зафатени од војна да го „решат својот правен статус“ до 10 септември или да бидат принудени да ја напуштат областа, според најновите разузнавачки информации за војната во Украина на британското Министерство за одбрана.

„Целта на указот на Путин е речиси сигурно да ги принуди украинските граѓани кои одбиваат да прифатат руски пасоши и државјанство да ја напуштат украинската територија окупирана од Русија“, се вели во извештајот објавен на „X“.

Кремљ продолжува да спроведува политика на „русификација“ на нелегално окупираните територии во Украина како дел од „долгогодишните напори за искоренување на украинската култура, идентитет и државност од таму“, се додава во соопштението.

Русија го смета за свој црноморскиот полуостров Крим, кој незаконски го анектираше пред повеќе од десет години, како и делумно окупираните региони Луганск, Доњецк, Запорожје и Херсон, стои во објавата.