Прв потег на Милановиќ по изборниот триумф: Пратил писмо до Пленковиќ да се свика Советот за одбрана

Претседателот на Република Хрватска, Зоран Милановиќ, денеска му предложи на премиерот на Република Хрватска, Андреј Пленковиќ да ја свика 16-тата седница на Советот за одбрана. Предлог на претседателот Милановиќ е седницата да се одржи во наредните две недели, соопштија од Пантовчак, јавуваат хрватските медиуми.

Претседателот Милановиќ предложил и теми за кои ќе се разговара на седницата на Советот за одбрана: (1) подготовка и усвојување на Стратегијата за одбрана на Република Хрватска, (2) подготовка и усвојување на Долгорочниот план за развој на вооружените сили на Република Хрватска и (3) разгледување на потребата и спроведување на воведување задолжителна воена служба во Република Хрватска.

Во својот предлог да се свика седница на Советот за одбрана, претседателот Милановиќ истакнал дека е отворен за договор за проширување на дневниот ред на предложената седница доколку премиерот оцени дека е потребно да се разговара за други теми поврзани со одбраната.

Според член 11 став 1 од Законот за одбрана седница на Советот за одбрана заеднички свикуваат претседателот на Републиката и претседателот на Владата.