Протекоа детали од телефонскиот разговор кој го натера Трамп да му сврти грб на Путин

Беше рано утрото на 4 јули кога генералот Кит Келог, специјалниот претставник на американскиот претседател Доналд Трамп за Украина, доби повик од Полска. На другата страна од линијата, објавува лондонски „Телеграф“, беше Радослав Сикорски, полскиот министер за надворешни работи, со она што може да биде една од најважните интервенции по руската инвазија на Украина.

Ноќта, полскиот конзулат во центарот на Киев беше оштетен од бараж од руски ракети и беспилотни летала. „Путин се потсмева на вашите мировни напори“, му рече Сикорски на генералот Келог. „Ве молам да го вратите снабдувањето со противвоздушна муниција на Украина“, додаде тој.

Испораките на оружје за Украина беа одеднаш замрзнати два дена претходно, што наведе многумина да веруваат дека администрацијата на Трамп повторно ја остава Украина сама на себе. За време на телефонскиот повик, генералот Келог се чинеше дека го слушнал предупредувањето за напад врз амбасадата.

Прелудиум за пресвртот на Трамп

Како пензиониран генерал со три ѕвездички, тој знаеше дека ова е инцидент што може да ја ескалира војната и да ја извади од контрола. Она што се случи потоа може да се смета за прв во низата настани што беа претходници на пресвртот на Трамп кон Украина.

Веднаш по разговорот со Сикорски, Келог се јави на бројот на претседателот. Трамп веднаш одговори. Откако му честиташе за „големиот, прекрасен закон“ на 4 јули, двајцата се фатија за работа во врска со Украина.

Киев беше погоден преку ноќ од 11 ракети и 539 беспилотни летала, најголемиот руски напад врз украинската престолнина од почетокот на војната. Уште поважно, нападите се случија неколку часа откако рускиот претседател Владимир Путин и Доналд Трамп разговараа по телефон за завршување на војната.

Веќе беше познато дека американскиот претседател беше фрустриран од одбивањето на неговиот руски колега да ги запре нападите врз украинските градови и ја отфрли понудата на САД за прекин на огнот. Генералот Келог го информирал својот шеф за последниот напад и како била погодена амбасадата на сојузникот на НАТО, Полска.

Потоа, пратеникот го искористил повикот за да го промовира континуираното распоредување на противвоздушните ракети „Патриот“ во Украина. Беа дискутирани потенцијалните ризици и придобивки од зголемувањето на пристапот на Киев до американските ракетни системи земја-воздух и пресретнувачите што ги испукуваат. Одговорот на Трамп бил брз: тој му наредил на Пентагон да ослободи дел од системите „Пац-3“ кои биле привремено замрзнати во американската помош додека службениците ги проценуваат американските залихи.

Трамп, исто така, му наредил на Келог да го контактира Пит Хегсет, американскиот секретар за одбрана, за да ги продолжи испораките на оружје во Киев. Подоцна се дозна дека Трамп претходно бил изненаден од одлуката на Хегсет да ги запре испораките на оружје во Украина, бидејќи не ја известил Белата куќа или Конгресот. Луѓе како генералот Келог и Марко Рубио, државниот секретар и советник за национална безбедност, дознале за неговата одлука само од вестите.

Одмрзнување на американската помош

Но, овој пат беше поинаку – и затоа Келог се погрижи лично за тоа. Кога го повика Хегсет, му кажа за одлуката на претседателот да продолжи да испорачува ракети „Патриот“ на Украина. Му рече на Хегсет дека ако не му верува, треба самиот да му се јави на Трамп.

Исто така, на 4 јули, американскиот претседател му вети на украинскиот претседател Володимир Зеленски дека ќе му помогне на Киев кога станува збор за воздушна одбрана. Приватно, меѓу најголемите поддржувачи на Украина во Вашингтон, одлуката беше поздравена како индикација дека Трамп за прв пат ја сфати важноста од користењето на американската моќ за зајакнување на Киев како потенцијален пат кон мировен договор. Сепак, на Пентагон му беа потребни најмалку четири дена за да ја испрати првата серија „Патриот“.

Администрацијата на поранешниот претседател Џо Бајден нарача 40 пресретнувачи „Пац-3“ во Полска со намера да ги испрати во Украина. Дванаесет на крајот беа испратени по разговорот меѓу Трамп и Келог.

Пресвртот на Трамп беше искористен и од европските престолнини, уверени дека тоа ќе го привлече американскиот претседател дополнително да го поддржи Киев. Фридрих Мерц, германскиот канцелар, почна да нуди купување системи „Патриот“ што ќе бидат испратени во Украина за да се зајакне одбраната на земјата разорена од војна.

Марк Руте, генералниот секретар на НАТО, отиде чекор понатаму, нудејќи му на Трамп можност неговите европски сојузници и Канада да му ги надоместат милијардите долари оружје произведено во САД испорачано во Украина.

Тоа беше договор што Трамп го прифати, а за кој советниците, како што е генералот Келог, тивко лобираа, промовирајќи ја идејата дека европските земји да плаќаат за американско оружје е демонстрација на неговите принципи „Да ја направиме Америка повторно голема“.

Оружјето не само што ќе го убеди Путин да седне на преговарачка маса, туку ќе ја демонстрира и ефикасноста на американската воена индустрија во услови на обидите на Европа да се вооружи со домашно произведено оружје. На Трамп му беа потребни само уште девет дена за да ја објави својата програма за помош од 10 милијарди долари, како и можноста за катастрофални трговски тарифи за Русија и сите земји што купуваат нејзини фосилни горива.

Благодарејќи на договорот со германија, до крајот на таа недела „Патриот“ и уште пресретнувачи дојдоа во Украина. Пентагон и Белата куќа го искористија тој потег за да ги уверат европските држави да рескираат и да ги испратат сите расположиви залихи во Киев и да чекаат Америка да ги снабди, пишува „Телеграф“.