Денес Пендаровски ќе се обрати на Генералното собрание на ОН

Претседателот  Стево Пендаровски денеска ќе се обрати на Генералната дебата на 76. Сесија на Генералното собрание на Обединетите нации во Њујорк, што се одржува на тема „Градење отпорност преку надеж – опоравување од Ковид-19, одржливо обновување, одговор на потребите на планетата, почитување на правата на луѓето и ревитализација на Обединетите нации“.

Во рамки на учеството на Генералното собрание на ОН, предвидено е претседателот Пендаровски да има средба со генералниот секретар на Светската организација  Антонио Гутереш, како и билатерални средби со шефови на држави и влади, учесници на Генералното собрание.

Претседателот Пендаровски, како што соопшти неговиот Кабинет, во Њујорк учествуваше на 20. Состанок на високо ниво во организација на Меѓународниот центар Низами Ганџави на тема „Што значат мирот и стабилноста во 21. век?“.

Во оваа прилика, претседателот се осврна на искуствата на Република Северна Македонија, ставајќи акцент на направените компромиси со соседите, членството во НАТО и посветеноста на интеграцијата на земјата во Европската Унија.

Притоа, претседателот Пендаровски констатира дека одржувањето на перспективата за членство во Европската Унија е клучниот двигател за реформите, не само во нашата држава, туку и во земјите од Западен Балкан, додека самото членство – клучно за обезбедување долгорочна стабилност, мир и просперитет во регионот.

Во рамки на активностите во Њујорк, претседателот Пендаровски имаше средба со извршната директорка на УНФПА, Наталиа Канем.

На средбата се разговарало за актуелната соработка меѓу нашата земја и УНФПА во однос на креирање на политики за населението и преземање на активности со цел подобрување на пристапот до услугите од областа на репродуктивното здравје и во насока на спречување и одговор на родово базираното насилство.

Претседателот Пендаровски во Њујорк учествуваше на виртуелниот Глобален самит за борба против Ковид-19: „Крај на пандемијата и поставување на подобри основи како подготовка за следната“, организиран од претседателот на САД, Џо Бајден, на маргините на 76. Генерално собрание на Обединетите нации.

Претседателот имаше средба и со преставници на организацијата  „Македонија2025“, при што посочи дека таа  е позитивен пример за придонесот на македонските иселеници во економскиот и демократски развој на Македонија. На средбата претставниците на „Македонија2025“ го информираа претседателот за досегашните активности и приоритети во контекст на нивното делување во Њујорк и на американскиот континент во целина.

Оддавајќи признание за досегашните вложени напори, претседателот Пендаровски ги охрабри претставниците на „Македонија2025“ за нивен засилен ангажман преку кои се искажува и волјата и решеноста на македонската дијаспора активно да се вклучи во градењето на иднината на Македонија. На средбата, како што стои во соопштението, стана збор за идните планови на организацијата, како и за програмите за стипендирање и други проекти преку кои активно се градат лидерски вештини кај младите и се поддржува нивниот талент. Во тој контекст, претседателот Пендаровски се заблагодари за вклученоста на „Македонија2025“ како партнери и поддржувачи на Школата за политики при Претседателскиот центар за политичко образование.

За време на посетата, претседателот Пендаровски е придружуван од сопругата, Елизабета Ѓоргиевска, која ќе се обрати на настанот на високо ниво посветен на одбележувањето на 30 години од глобалната 16-дневна кампања против родово-базираното насилство, ќе одржи предавање на Стоматолошкиот факултет при Универзитетот Колумбија и ќе го посети училиштето за деца со посебни потреби Jesse J. Kaplan.