Пред училиште во Србија убиени две момчиња

Во пукање кое ноќеска се случило пред основното училиште „Десанка Максимовиќ“ во новосадската населба Футог убиени се две момчиња, јавуваат српските медиуми.

Според д-р Зоран Круљ, портпаролот на новосадската Брза помош, првиот повик полицијата го добила 17 минути по полноќ.На местото на настанот било затекнато момче без свест кое во тешка состојба било пренесено на одделот за интензивна нега. Од извори упатени во истрагата, српски Телеграф пренесува дека 20-годишното момче било застрелано во главата. Повредите биле претешки и момчето починало во болница.

Следниот повик стигнал 51 минута по полноќ, кога полицијата на лице место затекнала уште едно момче без свест. Екипите на брзата помош можеле само да констатираат смрт на лице место. Имало 19 години.

Српските медиуми јавуваат дека полицијата синоќа извела опсежна акција, целиот Футог бил блокиран, како и сите излези од Нови Сад. Полицијата уапсила четворица осомничени, на возраст од 21 до 26 години, а наводно само еден од нив пукал во убиените момчиња.

-Се плашев за својот живот, затоа ги извршив убиствата, денеска во полициска станица изјавил 23-годишниот Н.Л. од Србија откако признал дека го извршил двојното убиство во новосадската населба Футог кога ги застрелал 19-годишниот Н.Ш. и 20-годишниот М.М.
Како што пишува српски „Блиц“, убиецот раскажал дека се плашел за својот живот, затоа што, наводно, двете убиени момчиња му се заканувале дека ќе го исечат со мачета и дека ќе го фрлат во Дунав.

– Веднаш штом ги здогледал Н.Ш. и М.М. како чекаат во автомобилот пред неговата куќа, тој се вратил дома и го земал пиштолот. Потоа, влегол во автомобилот во кој биле неговите пријатели и почнал да пука во правец кон жртвите – изјавил извор на „Блиц“, кој е сведок на настанот.Наводно, безбедносните камери на околните објекти го снимиле целиот настан, вклучително и самиот чин кога било извршено двојното убиство.