Потпишан воен пакт: Пакистан ќе ја брани Саудиска Арабија со нуклеарно оружје

Саудиска Арабија и нуклеарно вооружениот Пакистан во вторник потпишаа договор за меѓусебна одбрана, значително зајакнувајќи го децениското безбедносно партнерство во време на зголемени регионални тензии.

Зајакнувањето на одбранбените врски доаѓа во време кога земјите од Заливот се повеќе се претпазливи во однос на сигурноста на САД како нивен долгогодишен гарант за безбедност. Нападот на Израел врз Катар минатата недела ги зголеми тие загрижености.

„Овој договор е кулминација на години дискусии. Ова не е одговор на одредени земји или специфични настани, туку институционализација на долгогодишна и длабока соработка меѓу нашите две земји“, изјави за Ројтерс висок саудиски функционер.

Обидот на Израел да ги елиминира политичките лидери на Хамас во воздушните напади во Доха, додека тие разговараа за предложеното примирје посредувано од Катар, ги налути арапските земји.

Договорот би можел да донесе стратешки промени во сложен регион. Сојузниците на Вашингтон, монархиите од Заливот, се обидоа да ги стабилизираат врските со Иран и Израел за да ги решат долгогодишните безбедносни проблеми.

Но, војната во Газа донесе промени, а Катар, државата од Персискиот Залив, веќе беше изложена на директни напади двапати оваа година, еднаш од Иран и еднаш од Израел.

Договорот на Саудиска Арабија со Пакистан доаѓа неколку месеци откако Пакистан водеше краток воен конфликт со Индија во мај.

Портпаролот на индиското Министерство за надворешни работи, Рандхир Џаисвал, денес објави на X дека Индија е свесна за развојот на настаните и ќе ги проучи неговите импликации за безбедноста и регионалната стабилност на Њу Делхи.

Висок саудиски функционер, кој зборуваше под услов да остане анонимен, ја призна потребата од балансирање на односите со нуклеарниот ривал на Пакистан, Индија.

„Нашиот однос со Индија е посилен од кога било. Ќе продолжиме да го развиваме тој однос и ќе се стремиме да придонесеме за регионалниот мир на кој било начин што можеме“, рече тој.

На прашањето дали Пакистан ќе биде обврзан да ѝ обезбеди на Саудиска Арабија нуклеарен чадор како дел од договорот, саудиски функционер рече: „Ова е сеопфатен одбранбен договор што ги опфаќа сите воени средства“.

„Целта на овој договор, кој ја одразува заедничката посветеност на двете нации за зајакнување на безбедноста и постигнување безбедност и мир во регионот и во светот, е да се развијат аспекти на одбранбената соработка меѓу двете земји и да се зајакне меѓусебното одвраќање од каква било агресија. Во договорот се наведува дека секоја агресија против која било земја (од двете земји) ќе се смета за агресија против обете“, соопшти кабинетот на пакистанскиот премиер Шехбаз Шариф по потпишувањето.