Потпишан договорот за проектот паметен Аеродром, вреден 9 милиони евра

Денеска е потпишан договорот со кој што го почнува јавно-приватното партнерство помеѓу општина Аеродром и корперацијата „Crescent NV“ со цел имплементација на проектот за смарт односно паметен Аеродром.

– Овој проект е само почеток на дигиталните решенија кои што ќе се нудат во нашата општина во следните години. Посебно ме радува што иницијалната инвестиција која што ќе ја прави корперацијата „Crescent NV“ во општина Аеродром, на почетокот е некаде околу 9 милиони евра. Се работи за реномирана меѓународна компанија која што котира на Бриселската берза, но уште повеќе не радува што во имплементацијата на нивниот проект тие инкорпорираат и домашни, македонски компании, меѓу кои што ги вбројуваме А1 и Ассеко. Се работи за дигитални решенија  насочени кон паметно осветлување, паметна мобилност, воспоставување на бесплатни интернет зони на територија на општина Аеродром, така да ќе има многу решенија кои што граѓаните ќе ги сведочат во следниот период, а кој што понатаму ќе се прошируваат и надградуваат согласно технолошкиот развој кој што се шири во глобалниот свет – рече градоначалникот на Аеродром, Тимчо Муцунски.

Според него, во следните шест месеци отприлика ќе ја направи Аеродром првата паметна општина во поширока класификација на територија на цела Македонија.

Муцунски најави дека во рамките на проектот е паметно, енергетски ефикасно осветлување, потоа воведување електрични тротинети, поставување дигитални табли. Со ова, ќе се придонесе за безбедност на граѓаните, но и ќе се заштеди електрична енергија.