Последната жива партизанка од Сутјеска и Неретва ќе оди на инаугурацијата на Милановиќ

Сплиќанката Вјера Андријиќ, последната жива партизанка од битките на Сутјеска и Неретва, ќе оди на утрешната претседателска инаугурација на Зоран Милановиќ, пишува „Далмација данас“.

Андријиќ била медицинска сестра во првата чета на првиот баталјон на првата далматинска бригада во битките на Неретва и Сутјеска, а минатата година го прослави својот 101 роденден. Првата далматинска пролетерска шок бригада е основана на 6 септември 1942 година во селото Добро, кај Ливно. Бригадата имала вкупно 1.217 борци, од кои 83 жени.

„Кога имав 18 години, решив да се приклучам на движењето. Милка Планинц беше со мене на училиште, таа беше иницијатор. Подоцна ја сретнав на Вис. Откако поминав четири години во партизани, се сретнавме на Вис. По падот на Италија, отидовме во Вис со нашата единица. ‘Хајдук’ беше формиран на Вис, го имаше својот целосен состав“, изјави Андријиќ.

„Ја запознав љубовта на мојот живот на Вис. Кога имаше повеќе време за одмор, игравме, пеевме, се забавувавме. Тој ми го привлече вниманието. Излегов жива и здрава, од Црна Гора, Сутјеска, Зеленгора, Босна, Лика… Не беше лесно, но имаше таков морал во нашата војска, се боревме голораки, немавме ништо, и ранетите одеа назад во борба.”

Повеќе гости од минатиот пат
Во вторник на Пантовчак ќе има поголем број гости отколку на инаугурацијата пред пет години, кога имаше околу четириесетина. Меѓу стотината гости ќе бидат и тројцата поранешни претседатели на Републиката – Стипе Месиќ, Иво Јосиповиќ и Колинда Грабар-Китаровиќ.

Милановиќ испратил покани до премиерот Андреј Пленковиќ и до вицепремиерите, но тие нема да присуствуваат на церемонијата.

Нема да присуствуваат ниту претседателот на парламентот Гордан Јандроковиќ и потпретседателот на парламентот Жељко Рајнер (ХДЗ), за што се извинија, но на инаугурацијата на претседателот ќе присуствуваат другите потпретседатели на парламентот – Иван Пенава (ДП), Фурио Радин (НЗ) и Сабина Гласовац и Пеѓа Грбин (СДП).