Поранешен светски шампион во скок во височина пронајден мртов, бил застрелан

Кејптаун  – Јужноафриканската полиција го откри телото на поранешниот светски шампион во скок во височина Жак Фрајтаг, откако тој исчезна минатиот месец, објавија локалните медиуми во средата.

Извештаите велат дека 42-годишниот, кој ја освои светската титула во 2003 година во Париз и се натпреваруваше на Олимпијадата во 2004 година, бил застрелан.

Неговото семејство одби да коментира. Полицијата соопшти дека го пронашла телото на поле во близина на гробишта во градот Преторија. Телото сè уште не беше официјално идентификувано од членовите на семејството.

Сестрата на Фрајтаг, Криси Луис, апелираше за помош на социјалните мрежи за да се најде Фрајтаг, кој исчезна во утринските часови на 17 јуни откако ја напушти куќата на неговата мајка. Луис рече дека се борел со зависноста од дрога по завршувањето на неговата атлетска кариера.

Фрајтаг беше меѓу избраната група на спортисти кои освоија светски титули на младинско, јуниорско и сениорско ниво. (АП)