Почна уривањето на дивоградбите во Охрид, прва на удар „Куба Либре“

Под силно полициско обезбедување, денеска почна најавуваната акција за уривање на нелегалните градби и урбана опрема од плажите во градското подрачје на Охрид, јави дописникот на МИА.

За почеток се отстранува и демонтира платформата во езерото пред „Куба либре“, една од најатрактивните плажи и локации на источниот брег на Охридското Езеро.Акцијата беше очекувана, со оглед што уште пред една седмица во близина на неколкуте плажи зад мостот на Студенчишкиот Канал кај Охрид беше распоредена механизација, а вчера сите објекти во тој дел беа исклучени од системот за напојување со електрична енергија.

Градоначалникот на Охрид, Константин Георгиески, неодамна најави дека ќе се отстрануваат сите нелегални објекти и градби од сите плажи на кои им се истечените договорите за концесија, вклучувајќи ги и петте што влегуваат во опфатот на ГУП. 

Од плажата „Куба Либре“ сами го почнаа отстранувањето на монтажните делови од платформата, додека екипа ангажирана од локалната самоуправа работи на отстранување на металната конструкција во езерските води, која беше поставена согласно проектот одобрен од надлежните државни и локални институции пред речиси деценија и пол.

-Во 2007 година ни беше издадена документација како да изгледа проектот. Оттогаш плажата „Куба Либре“ не е мрдната ни лево ни десно. Плажава е изградена по сите проекти и дозволи од држава и од општина. Револтирани сме затоа што никој не дојде да каже како треба да изгледа ова, каков е планот понатаму, кои мерки ние да ги преземеме. Ако смета платформата ние сме подготвени доброволно да ја отстраниме, како и што почнавме, но за жал ни известување добивме, ниту некој дојде да каже. – истакна Марјан Маловчев, од менаџерскиот тим на плажата. Од Општината Охрид посочуваат дека плажите „Куба Либре“, „Кадмо“ и „Бела Виста“ каде што се вршеше отстранување на дивоизградените платформи и урбаната опрема, се опфатени во Генералниот урбанистички план, а во текот на наредните денови ќе се пристапи и кон расчистување на крајбрежјето на потегот кон населбата „Канео“.Интересно е што по неколкудневни бурни реакции во јавноста и обиди да ја спречат градежната механизација и самите угостители се придружија на расчистување. „Никој не може и не смее да биде над законите и интересите на Охрид! Општината е цврсто одлучена да воведе ред и да стави крај на долгогодишното самоволие и хаотично стопанисување со плажите на охридското крајбрежје“, порачаа од Општина Охрид. Медиумите забележаа дека за разлика од Охрид од Струга, која исто така е предмет на критики од УНЕСКО, нема ниту најави, ниту изјави ниту уривања.