Почина тинејџер, 41-ва жртва во пожарот во бар во Швајцарија. Одржан голeм протест

Кран Монтана -Бројот  на жртвите од катастрофалниот пожар во бар на новогодишната ноќ во швајцарски ски-центар Кран Монтана се искачи на 41, откако тинејџер повреден во несреќата почина во болница.

Веста беше потврдена од канцеларијата на локалниот јавен обвинител денес, еден ден откако неколку стотици демонстранти маршираа низ Лозана барајќи „правда и вистина“ за жртвите на трагедијата, во која беа повредени и 155 лица, објави RFI.

Кантонската јавна обвинителка Беатрис Пилу потврди дека 18-годишната швајцарска државјанка починала во болница во Цирих на 31 јануари.

„Бројот на жртви од пожарот во барот Le Constellation на 1 јануари 2026 година сега се искачи на 41“, се вели во соопштението. Обвинителката додаде дека нејзината канцеларија, која ја води истрагата, нема да објави никакви дополнителни информации во оваа фаза.

Стотици маршираат: „Не сте сами“
Во саботата, демонстрантите се собраа во Лутри, предградие на Лозана, од каде што доаѓаат некои од жртвите на пожарот во одморалиштето Кран-Монтана. „Тристан ќе наполнеше 18 години за четири месеци, но јас сум мајка на другите 155 жртви“, им рече на насобраните Винсијан Стаки, мајката што го загуби својот син, држејќи негова фотографија. „Ќе одиме до крај“, рече таа.

Таа беше една од членовите на семејството и пријателите на жртвите кои учествуваа во протестниот марш.

Некои носеа бели рози, додека други носеа транспаренти на кои пишуваше „Не сте сами“. Маршот започна од стадионот на локалниот фудбалски клуб, кој загуби седум свои играчи во пожарот. Поворката застана пред црквата, чии ѕвона ѕвонеа пет минути додека толпата положуваше цвеќе, пред да се врати на стадионот.

Истрага и безбедносни прашања
Пожар избувна на подрумот за танцување на барот Le Constellation, кој беше преполн со посетители на новогодишната забава. Обвинителите веруваат дека шишињата шампањ ја запалиле пената за звучна изолација на таванот.

Снимките од мобилни телефони покажаа млади луѓе како продолжуваат да се забавуваат, несвесни за опасноста сè додека не беше предоцна. Сведоците ја опишаа паниката што следеше додека толпата брзаше кон единствениот излез.

Повеќето од жртвите беа Швајцарци, но меѓу загинатите и повредените имаше вкупно 19 националности, вклучувајќи француски државјани.

Покрената е кривична истрага против поранешен службеник задолжен за безбедносните проверки во барот, кој стана третото лице обвинето покрај сопствениците, француски пар. Локалните власти открија дека барот немал годишна безбедносна проверка од 2019 година.

Зошто нашите деца не можеа да излезат?

Летиција Бродар-Ситре, друга мајка која изгуби дете, исто така беше на протестот. „Сакам да знам зошто нашите деца, меѓу нив и мојот син, не можеа да излезат. Зошто?“, праша таа. Александар Флери, таткото на младиот човек кој сè уште е во болница, исто така го изрази својот гнев.

„Кога поминувате низ трагедија каде што 40 деца и тинејџери ги загубија своите животи, а уште стотина се на рехабилитација или интензивна нега, очигледно е дека треба да се постават прашања“, рече тој, повикувајќи на „јасна и објективна истрага предводена од професионалци“.

Организаторката на маршот, Алегра Петруци, рече: „Речиси сите мои соученици беа во тој пожар. Повеќето од нив починаа, некои сè уште се во болница. Мораме да се бориме за нив“.

Десетици повредени сè уште примаат третман
Според најновите бројки од минатиот понеделник, 44 пациенти се лекуваат во странство: 18 во Франција, 12 во Италија, осум во Германија и шест во Белгија. Во исто време, уште 37 пациенти се лекуваат во швајцарските болници.

Службениците забележуваат дека бројките постојано се менуваат бидејќи пациентите се префрлаат меѓу болниците за различни фази од третманот, а некои се повторно примени за нега. Некои пациенти остануваат на интензивна нега.