Орбан за војната меѓу Русија и Украина: Не е јасно кој кого нападнал

Унгарскиот премиер Виктор Орбан во петокот го доведе во прашање фактот кој ја започнал војната меѓу Русија и Украина и ги критикуваше западните лидери за поддршката на Киев.

Виктор Орбан рече дека лидерите на ЕУ ја оправдуваат својата поддршка со прикажување на Украина како мала земја под напад, пишува Политико.

„Секако, не е толку мала“, рече Орбан, осврнувајќи се на Украина. „И дури не е јасно кој кого нападнал. Во секој случај, тоа е земја која била изложена на насилство“.

Кога рускиот претседател Владимир Путин започна целосна инвазија на Украина во февруари 2022 година, велејќи дека двете клучни цели на Москва се да го „ослободи Донбас од режимот во Киев“ и да ја „демилитаризира и денацификува“ земјата. Донбас е источен регион на Украина со мнозинско руско население, кој е во постојан конфликт со властите од Киев од 2014 година и соборувањето на тогашниот претседател Виктор Јанукович.

На својата годишна прес-конференција во петокот, Путин ја бранеше она што Кремљ го нарекува специјална воена операција во Украина. „Ние не се сметаме себеси за одговорни за смртта на луѓето бидејќи ние не ја започнавме војната“, рече Путин како одговор на прашање, обвинувајќи ја владата на украинскиот претседател Володимир Зеленски за „државен удар“.

Украинскиот министер за надворешни работи Андриј Сибиха одговори на коментарите на Орбан со објава на социјалните мрежи: „Исто толку „нејасно“ како што беше за раководството на Унгарија во 1939 година“.

Орбан им го рече ова на новинарите по самитот на Европскиот совет, каде што лидерите на ЕУ се согласија за заедничко задолжување во износ од 90 милијарди евра за испраќање финансиска помош на Украина.

Унгарија, Словачка и Чешка одлучија да не учествуваат во програмата за финансирање на Киев, зацврстувајќи го својот скептичен сојуз кон Украина и задавајќи уште еден удар врз единството на ЕУ откако лидерите не успеаја да постигнат договор за користење на повеќе од 200 милијарди евра замрзнати руски државни средства за да ѝ помогнат на Украина.

Орбан, исто така, откри пред самитот на ЕУ оваа недела дека Путин го предупредил дека Москва ќе преземе контрамерки доколку ЕУ посегне по руски средства за да ѝ помогне на Украина.

Според Орбан, Путин му рекол дека ќе има „силен одговор со користење на сите инструменти на меѓународното право и дека ќе се земе предвид ставот на секоја поединечна земја-членка на ЕУ“.

„Значи, ние Унгарците се заштитивме“, рече Орбан.