Орбан се надмина себеси: Ги плаши Унгарците дека Украина ќе ги нападне

Унгарскиот премиер Виктор Орбан, познат по своите про-Путин и антиевропски позиции и изјави, се надмина себеси во средата. Згрчен во неговата огнена реторика против Европската унија, во говорот пред илјадници луѓе во Будимпешта отиде толку далеку што сугерираше дека украинските трупи би можеле да влезат на унгарска територија.

Во својот говор, Орбан, цитиран од АФП, ги повика Унгарците да му се спротивстават на Брисел, како што направија против советската армија во 1956 година.

„Дали треба да попуштиме на волјата на странска сила, овој пат на Брисел, или треба да се спротивставиме? Ова е тешката одлука со која се соочува Унгарија сега. Предлагам нашиот одговор да биде јасен и недвосмислен како што беше во 1956 година“, рече тој пред илјадници луѓе собрани во парк во Будимпешта.

Орбан говореше на годишнината од избувнувањето на Унгарското востание, бунт против комунистичката влада и нејзината просоветска политика што започна на 23 октомври и беше задушена 12 дена подоцна од тенкови и војници на Црвената армија. Во упадот на Црвената армија имаше над 3.000 мртви

Според унгарскиот лидер, Брисел сака да ја направи неговата земја „марионетска држава, вазал“. Хероите од 1956 година не успеаја, но ние ќе победиме, изјави Орбан.

„Знаеме дека сакаат да нѐ вовлечат во војна. Знаеме дека сакаат да нѐ принудат да ги прифатиме нивните мигранти. Знаеме дека сакаат да всадат родови идеологии кај нашите деца“, додаде тој.

АФП забележува дека Орбан е единствениот лидер на ЕУ со блиски врски со Кремљ и редовно ја критикува западната поддршка за Украина.

Денеска отиде уште подалеку, навестувајќи ја опасноста од украинско навлегување на унгарска територија. Осудувајќи го „Планот за победа“ претставен минатата недела од украинскиот претседател Володимир Зеленски, премиерот изјави:

„Едно утро ние Унгарците ќе се разбудиме и ќе најдеме војници, источни Словени на нашата земја“.

Орбан ја извршната власт на Европската унија се обидува да ја собори неговата влада и да наметне „марионетска“ администрација во Будимпешта, споредувајќи го неговиот протест со антисоветскиот бунт од 1956 година.

„Знаеме дека тие имаат марионетска влада (на ум), партијата што сакаат да ни ја наметнат“, рече Орбан, алудирајќи на партијата Тиса на опозицискиот лидер Петер Маѓар. Орбан го обвини Маѓар дека „поканил странци да му помогнат против Унгарците“.

Орбан не кажа како Европската комисија, наводно, сака да ја собори неговата влада и да наметне марионетска администрација, и не наведе докази за какви било политики или изјави на ЕУ за да ги поткрепи таквите обвинувања.

Заострувањето на неговиот тон може да се објасни со одредена нервоза од зголемената опозициска конкуренција против неговата партија на домашен политички терен.

Опозицијата помина во водство во анкетите

Непосредно пред неговиот говор беше објавена последната анкета која донесе шокантни резултати за Орбан. За прв пат по многу години една опозициска партија ја престигна во популарноста партијата на премиерот Орбан, Фидес. Според оваа анкета на Истражувачкиот центар 21, тинк-тенк со седиште во Будимпешта, умерената централно-десничарска партија Тиса на Петер Маѓар, до лани член на Фидес и поранешен сопруг на поранешната министерка за правда Јудит Варга има предност од 42 наспроти 40 отсто во однос на Фидес.

Две други неодамнешни анкети покажаа дека Фидес има намалена предност пред Тиса.

„Унгарците испратија порака: режимот на Виктор Орбан е завршен“, рече Маѓар во изјавата по објавувањето на анкетата.

На денешната годишнина од антисоветското востание во 1956 година, Ројтерс потсетува дека минатиот месец клучниот висок советник на унгарскиот премиер, Балаш Орбан, предизвика бес и гнев во земјата велејќи дека Унгарија би поминала подобро доколку не се спротивставеше на советската инвазија во 1956 година и го критикуваше отпорот на Украина против инвазиските руски сили.

На друг митинг по говорот на Орбан зборуваше лидерот на опозицијата Петер Маѓар. „Има кукавици, згора на тоа, на раководни позиции, кои се гордеат што без борба би им ја предале државата на Русите, за да не го прават тоа што го направија момците од Пешта“, рече Маѓар насочувајќи ги зборовите кон политичарите на Фидес.