Новинарка го праша Трамп за Епштајн, тој повика да ѝ се земе лиценцата на Еј-Би-Си

Претседателот Доналд Трамп повика на одземање на лиценцата за емитување на телевизиската мрежа Еј-Би-Си, откако жестоко се налути на една од новинарките на мрежата, која праша зошто не наредува објавување на досиејата на Џефри Епштајн, наместо да чека Конгресот да дејствува.

„Знаете, тоа не е прашањето што ме засега. Тоа е вашиот став. Мислам дека сте ужасен новинар“, рече Трамп на 18 ноември. „Тоа е начинот на кој ги поставувате овие прашања“.

Претседателот продолжи да ја напаѓа новинарката, Мери Брус од Еј-Би-Си и никогаш не стигна директно да одговори на прашањето.

„Немам никаква врска со Џефри Епштајн“, рече Трамп. „Го исфрлив од мојот клуб пред многу години затоа што мислев дека е болен перверзник“.

„Тоа е измама на демократите“, рече Трамп, подоцна додавајќи: „Мислам дека лиценцата треба да му се одземе на Еј-Би-Си затоа што вашите вести се толку лажни и толку погрешни. И имаме одличен комесар, претседател, кој треба да го разгледа тоа“.

Во целосен пресврт, Трамп на 16 ноември ги повика републиканците во Претставничкиот дом да гласаат за објавување на досиејата поврзани со федералната истрага на Епштајн, покојниот финансиер и обвинет за сексуална трговија со луѓе, кој се самоуби во 2019 година додека чекаше судење.