Ник Рајнер во затвор под надзор за да не се самоубие

Лос Анџелес – Синот на режисерот Роб Рајнер и неговата сопруга Мишел, кој е осомничен за убиство на своите родители, е ставен под надзор во затвор поради можност за самоубиство.

Ник Рајнер (32) беше уапсен во недела попладне пред мотелот каде што изнајмил соба претходната вечер, а според извештаите на американските медиуми, ноќта пред убиството се однесувал чудно на божиќна забава и се расправал со своите родители.

Роб и Мишел Рајнер беа убиени ноќта помеѓу саботата и неделата, а нивните тела ги пронашла нивната ќерка, која веднаш ја известила полицијата и близок семеен пријател, актерот Били Кристал.

Според „Дејли мејл“, Ник е во затвор под надзор на тим за проценка на менталното здравје и од понеделник е во одделение за затвореници со „самоубиствени мисли“.

Полициските истражители сè уште собираат информации.

Рајнерови починале од убодни рани, а сомневањето дека нивниот син го сторил тоа е поткрепено со фактот дека неговата соба во мотелот била полна со крв и траги од крв.

Медиумите, исто така, објавуваат дека тој со години е на лекување од зависност од дрога и дека неговите родители често им кажувале на пријателите дека се загрижени за неговото однесување.