Неколку случаи на труење во Истанбул ја потресоа Турција

Неколку случаи на можно труење во последните денови во хотели и угостителски објекти ја потресоа Турција и ја принудија земјата да ги заостри мерките за контрола.

Четиричлено семејство почина по сомнение за труење со храна во хотел во Истанбул каде што престојувало за да се одмори по пристигнувањето од Германија. На третиот ден од нивниот престој во хотелот во Истанбул во населбата Фатих, родителите и нивните две деца биле примени во болница со симптоми на труење со храна, заедно со уште двајца странски посетители на хотелот.

Вкупно 11 осомничени се приведени во случајот, а четворица од нив се уапсени. Во извештајот доставен до обвинителството, врз основа на тестови на примероци од храна што ги консумирало семејството, се наведува дека кај нив не се пронајдени опасни или несоодветни супстанции, објави денес весникот „Милиет“.

Според прелиминарниот извештај од форензичката обдукција, веројатната причина за смртта на четворицата е хемиско труење од хотелската средина, а како помалку веројатна можност, труење со храна. Ова ја поддржува теоријата дека спрејот против инсекти во хотелот можеби бил причина за смртта на семејството.

Случајот на семејството Боџек не е единствен од ваков вид во последните денови. Една млада жена беше хоспитализирана во Истанбул откако пиела кафе направено со детергент наместо вода во ресторан во населбата Бејоглу во Истанбул, објавија турските медиуми.

Вработените во ресторанот беа испрашувани како дел од истрагата. Една од вработените призна дека погрешно користела шише полно со детергент за садови, мислејќи дека е вода, за да му го направи кафето на муштеријата. Полицијата открила дека детергентот бил истурен во шишиња што ги користел таткото на менаџерот на ресторанот во кујната.

Турските власти истражуваат и други случаи на можно труење со храна во последните денови откако јаделе храна надвор од домот во ресторани во Истанбул. Германски државјанин со турско потекло бил однесен во болница, а подоцна починал откако се почувствувал лошо во хотел во населбата Фатих во Истанбул, каде што престојувал во врска со саем. Според првичните информации, мажот пиел чај во хотелот и консумирал друга храна во областа на џамијата Сулејманија. Сопственикот на хотелот рекол дека не ги третирал просториите од штетници во изминатата година, објави „Хабертурк“.

Две сестри од Холандија, кои исто така престојуваат во хотел во населбата Фатих, се во болница поради сомневање за труење со храна. Тие се чувствувале лошо за време на ручек и побарале лекарска помош со поплаки од гадење, повраќање и дијареја откако консумирале каурма, пилешки бургер, школки и друга храна. Нема опасност по животот на сестрите, а истрагите за нивниот случај и случајот на починатиот германски државјанин продолжуваат.

Заострување на контролите

Случаите ги поттикнаа властите во земјата да ги заострат контролите. Турскиот министер за земјоделство и шумарство, Ибрахим Јумакли, објави дека се спроведуваат засилени инспекции на продавниците за улична храна по неодамнешните случаи на труење со храна, објави турската државна телевизија ТРТ Хабер.

Од почетокот на годината се извршени 1.143.000 инспекции на продавници за храна, рече Јумакли. 26.591 прекршители се казнети со 2,265 милијарди турски лири (46,2 милиони евра), а 506 случаи се упатени до обвинителите. Тој потсети дека Турција редовно објавува списоци на компании обвинети за фалсификување и опасни практики.

Во услови на јавна тензија околу смртта на четиричленото семејство и зголемениот интерес за темата за безбедноста на храната, денес во Истанбул се одржа посебен состанок под водство на гувернерот Давут Ѓул, на кој беа усвоени нови, построги мерки за контрола на храната и активностите на установите.

Меѓу нив е воведувањето на задолжителен 24-часовен видео и аудио надзор во сите комерцијални објекти, со снимки што ќе се чуваат 30 дена.