Наскоро ќе гледаме ретко порамнување на шест планети. Што значи тоа?

Вљубениците во ѕвезденото небо ги чека вистинско уживање за околу една недела – порамнување на дури шест планети. Порамнувањето или спојувањето на небесните тела ја опишува нивната очигледна близина кога тие изгледаат, ако се гледаат од Земјата, дека се блиску едно до друго.

Имено, на 3 и 4 јуни на небото во права линија ќе се појават Меркур, Марс, Јупитер, Сатурн, Нептун и Уран. Не е невообичаено да се видат две или три планети блиску една до друга, но порамнувањето од дури шест е прилично редок настан. Затоа ова позиционирање на пет или шест други планети од Сончевиот систем се нарекува големо порамнување.

Дали планетарното усогласување е опасно?
Често можеме да слушнеме или прочитаме дека овој вид на феномен има некое скриено значење, дека може да влијае на нашите животи и да предупредува за некој иден настан кој може да има негативни или позитивни последици врз нашиот живот. Така, некои ќе се запрашаат што може да ни се случи ако планетите се усогласат. Одговорот е – ништо.

Иако при ваква појава се чини дека небесните тела се блиску едно до друго, ова е само илузија создадена од дводимензионалниот поглед на универзумот. Во реалноста, планетите и понатаму ќе бидат на просечно растојание една од друга (нивното растојание зависи од орбитата) како порано. Само нам од Земјата ќе ни изгледа како да стојат многу блиску, бидејќи нашите очи не можат да ја забележат длабочината, или вистинското растојание меѓу нив.

Поради оваа измама, ќе изгледа како неколку планети да се наредени на мал дел од небото, додека во реалниот простор тие сè уште се многу далеку една од друга.

Не е ни чудо што во далечното минато, кога немало телескопи и кога астрономијата како наука сè уште била во зародиш, луѓето верувале дека порамнувањето на планетите укажува на некој судбоносен настан. Ова се многу ретки настани и логично е дека античките цивилизации, кои немале увид во вистинската природа на планетата, сметале дека има некое посебно значење.

Како да се набљудува овој спектакл?
Ако сакате да ја видите целосната убавина на овој небесен спектакл во раните утрински часови на почетокот на јуни, можеби ќе ви требаат визуелни помагала. Меркур, Марс, Јупитер и Сатурн ќе бидат доволно светли за да се видат со голо око, но за да се забележат Уран и Нептун ќе бидат потребни двогледи или телескоп, пишува Science Alert.

Порамнувањето ќе биде видливо од повеќето локации низ светот. Во кое време издигнуваат и заоѓаат планетите и по кој редослед, зависи од кој дел на светот го гледате ноќното небо. На страницата Време и датум, можете да изберете локација и датум и да видите кога некоја од планетите ќе се појави над хоризонтот.

Ако имате проблем да откриете која точно точка на небото претставува одредена планета, можете да посетите веб-страници како Stellarium, кои покажуваат каде се наоѓаат небесните тела на небото во однос на вашата позиција.