На Волстрит цените на акциите паднаа втор ден по ред
![](https://nezavisen.mk/wp-content/uploads/2020/11/wall-street-berza.jpg)
Вчера на Волстрит цените на акциите паднаа втор ден по ред, најмногу во технолошкиот сектор, бидејќи дел од инвеститорите се повлекуваат од пазарот по силниот раст на берзанските индекси од почетокот на годината.
Индексот Дау Џонс се лизна за 1,29 отсто, на 40.665 поени, додека С&П 500 падна за 0,78 отсто, на 5.544 поени, а Насдак 0,70 отсто, на 17.871 поени.
И вчера, втор ден по ред, секторот за производство на чипови беше под притисок бидејќи владата на претседателот Џо Бајден има намера да воведе нови ограничувања за извозот на чипови во Кина.
Дополнително, продолжи ротацијата на капиталот од технолошкиот сектор, кој доведе до раст во последниве години, во сектори кои би можеле да имаат поголема корист од намалувањето на каматните стапки.
Имено, на пазарот зајакна мислењето дека американската централна банка во септември ќе ги намали каматните стапки бидејќи инфлаторните притисоци се намалуваат, додека економскиот раст забавува.
“Претходните денови видовме ротација на пазарот – повлекување од технолошкиот сектор, и инвестиции во други. Но, денес распродажбата ги погоди речиси сите сектори. Се чини дека некои инвеститори се повлекуваат од пазарот и го движат капиталот во готовина, по силниот пораст на цените на акциите во последните месеци“, објаснува Тим Гриски, стратег во Ingalls & Snyder.
Поради ова, индексот Дау Џонс вчера се лизна од рекордните нивоа, по три дена раст. Индексот Расел 2000, кој ги вклучува акциите на малите и средните компании, падна втор ден по ред, откако во претходните пет дена скокна за повеќе од 11 отсто.
Аналитичарите очекуваат заработката да расте во просек за 11 отсто на годишно ниво
Инвеститорите се фокусирани и на деловните резултати на компаниите и банките во вториот квартал. Од 60-те компании од индексот С&П 500, кои досега објавија извештаи, 85 отсто од нив ги надминаа очекувањата во однос на заработката.
Благодарение на ова, аналитичарите во анкетата на Ројтерс сега очекуваат заработката да порасне во просек за 11 отсто на годишно ниво, додека пред десетина дена очекуваа раст од околу 10 отсто.
И на повеќето европски берзи цените на акциите вчера пораснаа. Лондонскиот ФТСЕ индекс зајакна за 0,21 отсто, на 8.204 поени, а париски CAC порасна за исто толку, достигнувајќи 7.586 поени. Франкфуртскиот DAX се лизна, пак, за 0,45 отсто, на 18.354 поени.