На Германија ќе ѝ требаат повеќе имигранти за да го спречи недостигот на работна сила
На Германија ќе ѝ бидат потребни повеќе имигранти за да се спречи сериозен недостиг на работна сила што може да ја поткопа продуктивноста и да се загрози успешната енергетска транзиција, рече германскиот министер за економија, додека најголемата европска економија се соочува со демографска криза.
– Денеска имаме 300.000 слободни работни места и очекуваме бројката да се искачи на милион и повеќе – изјави на прес-конференција Роберт Хабек, лидер на Партијата на зелените.
„Ако не го намалиме тој јаз, ќе имаме реални проблеми со продуктивноста“, рече тој.
– Се разбира (тоа значи) подобра комбинација на квалификации, обука и можности за семејства и работни места, но во Германија секако е зголемена имиграцијата, во сите области, за инженери, занаетчии, негувателки. Тоа мораме да го организираме – изјави Хабек, кој е и вицеканцелар во новата германска тристрана владејачка коалиција предводена од социјалдемократот Олаф Шолц.
Германскиот економски институт, приспособен на работодавците, проценува дека оваа година работната сила ќе биде намалена за повеќе од 300.000 луѓе, бидејќи повеќе постари работници заминуваат во пензија отколку помлади кои влегуваат на пазарот на трудот.
Овој јаз се очекува да се зголеми на повеќе од 650.000 во 2029 година, оставајќи акумулиран недостиг на работоспособни луѓе во 2030 година од околу пет милиони.
Бројот на вработени Германци порасна на речиси 45 милиони во 2021 година, и покрај пандемијата на коронавирус.