„Моливерзум“ – модата, литературата и технологијата се споија на изложбата на студентите од Институтот за дизајн и инженеринг на облека
Читајќи ги Тартиф, Мизантроп или Дон Жуан, како денес би изгледале ликовите од големиот француски писател Молиер, во годината кога се одбележуваат јубилејни 400 години од неговото раѓање?
Со користење на модерната технологија, а со тоа на еден оригинален начин, синоќа, студенти од Технолошко-металуршки факултет – Институт за дизајн и инженеринг на облека во Скопје, под менторство на професорките Лидија Георгиева, Ирина Бабамова и Снежана Петрова, на изложба во НУБ „Св. Климент Охридски“ презентираа модни дизајни, инспирирани од комедиите во стихови на Молиер кои се класика во светската литература.
Секој уникатен модел на студентите кои ја величат естетиката или француската историја, е придружуван со пасус од творештвото на Молиер по избор на студенти од Катедрата за романски јазици и книжевности при Филолошиот факултет „Блаже Конески“ на УКИМ во Скопје, во соработка со Францускиот институт во Скопје.
Бројните гости од модниот и дипломатскиот свет синоќа уживаа во креативноста на студентите по дизајн.
Изложбата на дизајни насловена како „МОЛИВЕРЗУМ/MOLIVERS“ е остварување на првата фаза од еден амбициозен и обемен проект, чијшто добитник и носител е Технолошко-металуршкиот факултет при УКИМ, по објавениот интерен конкурс за распределба на средства за културни, спортски активности и други манифестации на Универзитетот „Св. Кирил и Методиј“во Скопје, за оваа година.
Втората фаза вклучува наградно патување на студентите и нивна изложба/инсталација во Париз.
Третата фаза ќе биде презентација и декорирање на излогот на Францускиот институт во Скопје.
Во рамките на настанот, од фондот на НУБ беа изложени и две витрини со избор од творештвото на Молиер. (Л.С.)
