Мишелин повеќе нема да оценува само ресторани, туку и вина

Водичот Мишелин, познат низ целиот свет по својата класификација на ресторани, сега ќе доделува награди и на вина. Веста ја објави минатата недела директорката на Мишелин, Гвендал Пуленек, според француското списание La Revue du vin de France. Деталите за временската рамка, критериумите за оценување и имињата на дегустаторите сè уште не се објавени.

Компанијата е сопственик на публикацијата Robert Parker Wine Advocate од 2019 година. Се очекува воспоставениот бренд на меѓународна винска критика да продолжи да работи заедно со Мишелин, објасни извршниот директор на Мишелин, Флоран Менего.

Во последниве години, водичот значително го прошири својот бизнис модел: откако ги купи Tablet Hotels во 2018 година, Мишелин ќе ја лансира и својата прва класификација на хотели, „Michelin Key“ (clefs Michelin), во 2024 година. Оваа награда го надополнува светски познатиот систем на ѕвезди Мишелин за ресторани.

Водичот на Мишелин, кој ќе ја прослави својата 125-годишнина во 2025 година, сега е достапен во околу 70 земји низ целиот свет. Тоа е престижен водич за ресторани и хотели објавен од француската компанија за гуми „Мишлен“. Иако започна како практичен водич за возачи на почетокот на 20 век (со мапи, совети за патување и список на хотели/ресторани), стана најпознат по своите оценки на рестораните.

Најпознатиот дел од водичот се ѕвездите на Мишелин, кои им се доделуваат на рестораните врз основа на квалитетот на храната. Ресторани со една ѕвезда означуваат висококвалитетна кујна што вреди да се посети, две ѕвезди означуваат одлична кујна поради која вреди да се скршне од патот, а три ѕвезди означуваат исклучителна кујна што вреди да се посети посебно.

Покрај ѕвездите, водичот може да ја додели и ознаката „Bib Gourmand“ за ресторани што нудат квалитетна храна по поприфатлива цена, како и препораки за ресторани.