Мирен изборен ден во Црна Гора со помала излезност на гласачите

Денешните вонредни парламентарни избори во Црна Гора минуваат мирно и само со помали нерегуларности, но излезноста е помала од изминатите парламентарни и претседателски избори, најавуваат набљудувачите.

Според Центарот за демократска транзиција, до 15 часот  гласаа околу 35 отсто од гласачите што е помалку отколку на парламентарните и претседателските избори во април 2020 година, кога излезноста беше околу 50 отсто.

Нерегуларностите главно се однесуваат на фотографирањето на гласачките ливчиња, а евидентиран е и еден конфликт меѓу гласачите и членовите на изборната комисија на избирачкото место.

Избирачките места се отворени до 20 часот, а првите резултати се очекуваат околу 21 часот.

На изборите учествуваат 15 партии и коалиции, а анкетите покажуваат дека Европското движење на претседателот Јаков Милатовиќ со околу 30 отсто од гласовите ќе биде клучно за формирање на новата влада.

Милатовиќ по гласањето пред новинарите изјави дека новата влада треба да го продолжи патот на реформите, да го подобри животниот стандард на граѓаните и владеењето на правото и да го забрза европскиот пат на Црна Гора.

Изборите ги следат околу две илјади набљудувачи, од кои 200 се од странство.