„Милка“ прогласена за „најдрска рекламна лага“

Алпското чоколадо „милка“ беше прогласено за „најдрска рекламна лага“ на годината во анкета на организацијата за заштита на потрошувачите Foodwatch.

„Чоколадото „милка“ е учебник за таканаречена „скратена инфлација“ и токму затоа потрошувачите ја прогласија за најдрска рекламна лага на годината“, се вели во соопштението на организацијата Foodwatch.

„Скратена инфлација“ се користи во случаи кога производите не се поскапуваат по секоја цена, туку нивната содржина се намалува, а се задржува истата цена.

Зголемување на цената за 48 проценти
Триесет и четири проценти од анкетираните гласаа чоколадото „милка“ да ја добие негативната награда „Goldener Windbeutel“ („Windbeutel“ е вид десерт и буквално значи „кеса со воздух/ветер“).

„Монделез“ ја зголеми цената на своето алпско чоколадо „милка“ од 1,49 на 1,99 евра, а кратко потоа ја намали тежината на чоколадото од 100 на 90 грама. Ова, како што објави „Фудвоч“, претставува зголемување на цената од 48 проценти.

Мултинационалната компанија „Монделез“ го објасни зголемувањето на цената со зголемувањето на цените на какаото на светскиот пазар, како и со други фактори што влијаат на конечната цена на производот.

„Деловното опкружување е посложено и понестабилно од кога било“, рече „Монделез“.

Критики поради недостаток на транспарентност
„Фудвоч“, пак, го критикуваше недостатокот на транспарентност, особено кога станува збор за намалување на тежината.

„На предната страна на чоколадото пишува дека станува збор за чоколадо од 90 грама, но етикетата е мала и често е покриена на полиците во супермаркетите“, смета „Фудвоч“.

Организацијата за заштита на потрошувачите посочува на статистички податоци според кои цената на чоколадото во Германија се зголемила за околу осум проценти минатата година, додека во исто време Монделез ги зголемил цените на некои чоколадни производи за дури 64 проценти.

Други добитници на негативни награди
На второто место на озлогласената листа на измами на потрошувачите се најде пушен лосос од норвешка компанија која е критикувана поради непочитување на законите за заштита на животните.

На третото место се најде чоколадото наречено „менстру чокобар“, наменето за жените за време на менструацијата за кое тврдат дека  содржи состојки како железо и витамин Б6 за кои се вели дека ги ублажуваат менструалните непријатности.

Според Фудвоч, нема научни докази за ова тврдење.

На четвртото место се најде популарниот маргарин „рама“ произведен од Флора Фуд Груп, за кој потрошувачите се жалат бидејќи на пакувањето пишува дека содржи „100 проценти природни состојки“, иако производот, според Фудвоч, е полн со дополнителни индустриски произведени состојки.